- २ श्रावण २०८३, शनिबार / Jul 18, 2026
दैलेख । बलात्कार कसुर प्रमाणित भएका एक युवकलाई दैलेख जिल्ला अदालतले १९ वर्ष कैद सजाय फैसला गरेको छ । मानसिक रुपमा अपाङ्ग रहेकी १३ वर्षीया बालिकालाई बलात्कार गरेका दुल्लु नगरपालिका–४ का २४ वर्षीया दीपक विकलाई अदालतले १९ वर्ष कैद सजाय फैसला गरेको हो । जिल्ला न्यायाधीश दण्डपाणि लामिछानेको एकल इजलासले उक्त फैसला गरेको अदालतका श्रेस्तेदार इन्द्रबहादुर कार्कीले जानकारी दिए । बलात्कृत बालिका मानसिक रुपमा अपाङ्ग छिन् । बालिका मानसिक अपाङ्गता रहेको दुल्लु अस्पतालको रिपोर्टमा उल्लेख छ ।
अभियुक्त दीपकलाई बालिका बलात्कार कसुरमा १८ वर्ष र सुस्त मनस्थितिको बालिकालाई बलात्कार गरेको कसुरमा थप एक वर्ष गरी १९ वर्ष कैद सजाय तोकिएको श्रेस्तेदार कार्कीले जानकारी दिए । श्रेस्तेदार कार्कीका अनुसार बालिकालाई क्षतिपूर्तिस्वरूप दीपकले १ लाख रुपैयाँ उपलब्ध गराउनु पर्ने र पीडित राहत कोषमा दुई हजार दुई सय रुपैयाँ जम्मा गर्न पनि अदालतले आदेश दिएको छ । मदिरा सेवन गरेका दीपकले ती बालिकालाई घर नजिकै खेलिरहेको मौका छोपी चाउचाउ खुवाउने प्रलोभनमा पारी बाँसघारीमा लगेर जबरजस्ती करणी गरेका थिए ।
२०७६ मंसिर ३० गतेको बालिका बलात्कारको घटनामा पीडित बालिकाका आफन्तले २०७६ पुस ३ गते जिल्ला प्रहरी कार्यालय दैलेखमा उजुरी दिएका थिए । प्रहरीमा उजुरी दिएकै दिन पीडित बालिकाको दुल्लु अस्पतालमा स्वास्थ्य परीक्षण गरिएको थियो । प्रहरीले अभियुक्त दीपकलाई पक्राउ गरेर अनुसन्धानपछि तयार पारेको प्रतिवेदनका आधारमा जिल्ला सरकारी वकिल कार्यालयले दैलेख जिल्ला अदालतमा जबरजस्ती करणी सम्बन्धि अभियोग पेश गरेको थियो ।
उक्त अभियोग सम्बन्धमा थुनछेक बहसपछि अभियुक्त दीपकलाई पुर्पक्षका लागि दैलेख जिल्ला कारागारमा थुनामा राखिएको थियो । बलात्कार भए नभएकोबारे पुष्टि गर्न बालिका पीडितको भेजिनल स्वाब राष्ट्रिय विधि विज्ञान प्रयोगशालामा पठाइएको थियो । प्रयोगशालाबाट भेजिनल स्वाबको रिपोर्ट आउन ढिलाइ भएका कारण उक्त बलात्कार घटनामा एक वर्ष पछि फैसला भएको हो । अन्नपूर्णपोष्ट दैनिकबाट…
