- २५ श्रावण २०८३, सोमबार / Aug 10, 2026
काठमाडौं । महांकाल–आरुबारी सडकखण्डको कालोपत्रे भत्किँदा सर्वसाधारण सास्ती खेप्न बाध्य बनेका छन् । चुच्चेपाटी हुँदै महांकाल, कपन, गोकर्ण पुग्न यही सडकखण्ड प्रयोग गर्नुपर्छ । चुच्चेपाटीबाट महांकाल, तीनुचुली र आरुबारी हुँदै गोकर्ण र मेडिकल कलेज जाने वैकल्पिक मार्ग पनि हो । स्थानीय उर्मिला श्रेष्ठ विभिन्न बहानामा खनिएका खाल्डाखुल्डी बेलामै नपुर्दा सवारी दुर्घटना हुनसक्ने खतरा औंल्याउँछिन् । ‘खाल्डाखुल्डी भएको एक वर्षभन्दा बढी भइसक्यो, त्यही पनि स्थानीय सरकारले ध्यान दिएको छैन,’ उनी भन्छिन्, ‘दैनिक यही बाटो हिँड्नुपर्छ । जति भने पनि केही लागेको छैन ।’
यही सडकखण्ड दैनिक हिँड्ने यात्रु इन्द्र लामा कालेपत्रे गर्दा कमजोरी गरेकाले छिट्टै भत्किएको बताउँछन् । ‘मेलम्ची खानेपानीको पाइप र ढल ब्लक भएकाले खनिएको थियो,’ उनी भन्छन्, ‘यो खाल्डो अस्ति पारेको हो, अर्काे खनेकोचाहिँ एक साता भयो । बारम्बार कालोपत्रे गर्न आग्रह गर्दासमेत सुनिएको छैन ।’
उता, काठमाडौं महानगरपालिका–६ वडाध्यक्ष दीपेन्द्र लामा वर्षायाममा पानी निकास नहुने भएकाले कालोपत्रे भत्किएको बताउँछन् । ‘जुनजुन ठाउँमा खाल्डा भएका छन्, ती क्षेत्रमा चालू आर्थिक वर्षभित्रै कालोपत्रे गरिँदै छ,’ उनले भने, ‘त्यस ठाउँका लागि मंगाल बनाउने तयारी पनि भएको छ ।’
वडाध्यक्ष लामाका अनुसार सडक विभागलाई पत्रचारसमेत गरिसकिएको छ । ‘विभागले गरेन भने नगरपालिकालाई निकास गर्न लगाइहाल्छौं,’ उनले भने, ‘यसअघि पनि सडक विभागले नै गरेको हो । अहिले हामीलाई जिम्मा दिएको खण्डमा नगरपालिकाबाट बजेट ल्याएर भए पनि पिच गर्नेछौं ।’
समाचार आजको राजधानी दैनिकमा छ ।
