- २९ श्रावण २०८३, शुक्रबार / Aug 14, 2026
काठमाडाैं । कांग्रेस नेता रामचन्द्र पौडेलले सर्वोच्च अदालतका चार न्यायाधीशविरुद्ध प्रमुख प्रतिपक्ष दल एमालेले महाभियोग प्रस्ताव ल्याउन नमिल्ने बताएका छन् । सोमबार काठमाडौंमा आयोजित एक कार्यक्रममा सञ्चारकर्मीहरूले राखेको जिज्ञासामा पौडेलले संसद् विघटनको मुद्दामा आफूलाई हराएबापत सर्वोच्चको निर्णयविपरीत एमालेले महाभियोग प्रस्ताव ल्याउन नमिल्ने बताएका हुन् ।
‘खै, अब उहाँहरूले त्यो प्रस्ताव ल्याउनुहोला जस्तो लाग्दैन । त्यो प्रस्ताव ल्याउनुहोला भन्ने विश्वास छैन । र, एउटा कुरा के हो भने आफूलाई मुद्दा हराएबापत महाभियोग ल्याउन पाइँदैन । त्योचाहिँ सरासर अनुचित हो । किनभने, मुद्दाको हकमा सर्वोच्चको निर्णय नै अन्तिम हुन्छ । त्यसलाई चुनौती दिनुहुँदैन, त्यो पाइँदैन,’ उनले भने । पौडेलले आफूले प्रधानन्यायाधीश चोलेन्द्रशमशेर राणालाई सम्मानजनक बहिर्गमनका लागि राजीनामा दिन पटक–पटक सुझाएको पनि स्मरण गरे ।
कांग्रेस संसदीय दलको बैठक आज
प्रधानन्यायाधीश चोलेन्द्रशमशेर राणाविरुद्ध महाभियोगको प्रस्ताव दर्ता गरेपछि नेपाली कांग्रेसले संसदीय दलको बैठक बोलाएको छ । मंगलबार बिहान ९ बजे नयाँ बानेश्वरस्थित संसद् भवनको ल्होत्से हलमा दलको बैठक बस्नेछ । सूचनामा बैठकको एजेन्डा भने खुलाइएको छैन । कांग्रेससहित माओवादी केन्द्र र एकीकृत समाजवादीका ९८ सांसदले आइतबार प्रधानन्यायाधीश राणाविरुद्ध महाभियोग प्रस्ताव दर्ता गराएका थिए । प्रस्तावका विषयमा खेल्ने भूमिकाका विषयमा छलफल गर्न बैठक बोलाइएको बताइएको छ । नयाँ पत्रिका दैनिकबाट….
