अरुण तेस्रो मूल्यांकन चित्त बुझ्दो भएन

खोटाङ । अरुण तेस्रो जलविद्युत आयोजना प्रभावितले घरबार विहीन बनाउने षड्यन्त्र भएको भन्दै आपत्ति जनाएका छन् । जानकारी नै नदिई जग्गाको मूल्यांकन गरेको, जग्गाको वस्तुगत आधारमा पहिचान नगरी चलन–चल्तीको मुल्यभन्दा कम निर्धारण गरेको लगायतका विषयप्रति चित्त नबुझेको उनीहरुले भनेका छन् ।

अरुण तेस्रो बारे बिहीबार खोटाङको साकेला गाउँपालिकाको रतन्छामा आयोजित छलफल । साकेला गाउँपालिकाले प्रभावितहरुसँग गरेको छलफलको क्रममा चित्त बुझ्दो क्षतिपूर्ति दिनुपर्ने माग समेत गरेका छन् ।

गाउँपालिकाले वडा १ को बाँझेच्यानडाडाँ र वडा २ को रतन्छाका प्रभावितहरुसँग बिहीबार छलफल गरेको थियो । रतन्छाका आयोजना प्रभावित प्रेमकुमार राईले आफूहरुलाई जानकारी नै नदिइ जग्गा अधिग्रहण गरिएको बताए ।

प्रभावित कूलबहादुर राईले बोटबिरुवाहरुको मुल्य निर्धारण गर्दा कतिपय महत्वपूर्ण र बर्सेनि आम्दानी दिने भएकाले त्यसको मूल्यांकनमा ध्यान दिनुपर्ने बताए । लिची, सुन्तला, रुद्राक्ष लगायतका महत्वपूर्ण बोटविरुवाहरुको क्षतिपूर्ति उल्लेख गर्नुपर्ने उनको भनाइ छ ।

रतन्छाकै आश्विनचन्द्र राईले अरुण तेश्रोबाट प्राप्त हुने मुआब्जाले अन्यत्र जग्गा नआउने र कतिपय नागरिक विस्थापित हुनुपर्ने अवस्था सिर्जना भएको बताए । मपारुङ कृषि फर्मका सञ्चालक कविकुमार राईले आफ्नो व्यवसायबाट वार्षिक करोडौं रुपैयाँ आम्दानी गर्ने सोंच बनाएको तर अहिले अरुण तेश्रो आयोजनाबाट आफ्नो पूरै व्यवसाय प्रभावित हुने भए पछि अन्योलमा परेको बताएका छन् ।

आयोजनाबाट प्राप्त हुने क्षतिपूर्तिबाट प्रभावितको जीवनस्तर नउठ्ने भएकाले घर, घडेरी तथा तारमुनि पर्ने जग्गाहरुको उचित मूल्यांकन हुनुपर्ने बताए । यो समाचार आजको कान्तिपुरमा छ ।