- २९ बैशाख २०८३, मंगलवार / May 12, 2026
म्याग्दी, २९ वैशाख । अन्नपूर्ण गाउँपालिका–७ महभिरमा पहिरो खसेपछि मुस्ताङलाई राष्ट्रिय राजमार्गसँग जोड्ने बेनी–जोमसोम–कोरला सडक आज बिहानदेखि अवरुद्ध भएको छ ।
ढुङ्गा र माटोसहितको पहिरो खस्दा ७६ किलोमिटर दूरीको बेनी–जोमसोम सडकमा सिधा यातायात सम्पर्क विच्छेद भएको हो । सडक अवरुद्ध भएपछि बेनीदेखि मुस्ताङ र जोमसोमदेखि बेनीतर्फ आउँदै गरेका सवारीसाधन बीचबाटोमै रोकिएका छन् ।
सडक बन्द हुँदा स्थानीयवासीसँगै मुस्ताङ भ्रमण तथा मुक्तिनाथ मन्दिर दर्शनका लागि आवतजावत गर्ने पर्यटक र तीर्थयात्री प्रभावित भएका छन् । जिल्ला प्रहरी कार्यालय म्याग्दी का सूचना अधिकारी सागर तिमिल्सीना ले सडक विभागका उपकरण परिचालन गरेर अवरुद्ध सडक खुलाउने प्रयास भइरहेको जानकारी दिए ।
महभिर क्षेत्रमा सडकभन्दा करिब ५०० मिटर माथिबाट पहिरो खस्ने समस्या दोहोरिने गरेको स्थानीयवासी बताउँछन् । सामान्य वर्षा हुँदा पनि लेदोसहित पहिरो खस्ने भएकाले सडक अवरुद्ध हुनुका साथै दुर्घटनाको जोखिम समेत बढ्दै गएको छ ।
