काठमाडौं, २९ वैशाख । इन्द्रसरोवर गाउँपालिका वडा नम्बर २ लामबगरस्थित सिस्नेरी–दक्षिणकाली सडकखण्डमा ईभी गाडी दुर्घटना हुँदा नौ जना भारतीय नागरिक घाइते भएका छन् ।
जिल्ला प्रहरी कार्यालय मकवानपुरका अनुसार सोमबार राति करिब ११ः१० बजे काठमाडौँबाट हेटौँडातर्फ आउँदै गरेको बा.प्र.०१–०३३ च ५२५८ नम्बरको ईभी गाडी ब्रेक फेल भई सडकको दाहिनेपट्टिको भित्तामा ठोक्किँदा दुर्घटना भएको हो ।
दुर्घटनामा घाइते भएका मध्ये तीन जनाको अवस्था गम्भीर रहेको प्रहरीले जनाएको छ । घटनापछि जिल्ला प्रहरी कार्यालय मकवानपुर अन्तर्गत प्रहरी चौकी खानिखेतबाट प्रहरी सहायक निरीक्षक मनोजकुमार यादव र प्रहरी चौकी सिस्नेरीबाट प्रहरी सहायक निरीक्षक रामवली साहको नेतृत्वमा खटिएको टोलीले उद्धार कार्य गरेको थियो ।
प्रहरीका अनुसार गाडीमा चालकसहित ११ जना सवार थिए । तीमध्ये नौ जना भारतीय नागरिक र चालकसहित दुई जना नेपाली नागरिक रहेका थिए । दुर्घटनामा घाइते भएका सबैलाई उद्धार गरी उपचारका लागि काठमाडौँ पठाइएको प्रहरीले जनाएको छ ।
ईभी चालक पिन्टु सिंह हाल प्रहरी नियन्त्रणमा रहेका छन् । उनी धनुषाको लक्ष्मीनिया नगरपालिका–४ निवासी ३० वर्षीय व्यक्ति हुन् ।
