- ३१ आश्विन २०८३, शनिबार / Oct 17, 2026
मनाङ। विश्वकै १०औँ स्थानमा पर्ने जोखिमयुक्त पदमार्ग र मनास्लु पदयात्रा गर्दै हिमाली जिल्ला मनाङमा यो वर्ष २१ हजार विदेशी पर्यटकले घुमफिर गरेका छन् । तथ्याङक अनुसार विसं २०८० मा २१ हजार चार सय ९५ पर्यटकले घुमेका छन् ।
वैशाखदेखि चैत मसान्तसम्ममा सो सङ्ख्यामा विदेशी पर्यटक भित्रिएको अन्नपूर्ण क्षेत्र संरक्षण आयोजनाले जनाएको छ । फ्रान्सका नागरिक बढी आगमन भएको तथ्याङ्कमा देखिएको छ । फ्रान्सका दुई हजार चार सय ८२ नागरिकले मनाङ भ्रमण गरेको अन्नपूर्ण क्षेत्र संरक्षण आयोजना प्रमुख ढकबहादुर भुजेलले बताए । त्यसैगरी इजरायलका एक हजार आठ सय २१ र जर्मनीका एक हजार सात सय ५४ नागरिक रहेका छन् ।
नयाँ वर्ष २०८१ को पहिलो दिनमा मात्रै एक सय १५ विदेशी पर्यटक भित्रिएको प्रमुख भुजेलले बताए । आन्तरिक पर्यटक पनि बिदाको समयमा भ्रमणमा आउने क्रम बढ्दो छ । आन्तरिक पर्यटकको भने अभिलेख नराखिने बताइएको छ । आन्तरिक पर्यटकको रोजाइमा तिलिचो ताल पर्ने गरेको छ ।
हिमाल, पहाडका दृश्य, मनाङवासीको संस्कार, संस्कृति, रीतिरिवाज, प्राकृतिक सुन्दरता हेर्न पर्यटकको यहाँ आगमन हुने गर्दछ । पछिल्लो समय सवारी साधनमा नै चामे, खाङ्सारसम्म पुग्ने गरेको पाइन्छ । त्यसपछि मात्रै मुख्य गन्तव्यतर्फ पदमार्गको यात्रा गर्ने गरेको पर्यटकको भनाइ छ ।
