- २ कार्तिक २०८३, सोमबार / Oct 19, 2026
काठमाडाैं , १३ साउन । देशभर मनसुनी प्रणालीको सक्रियता बढेसँगै आज विभिन्न प्रदेशहरूमा झरी पर्ने सम्भावना रहेको मौसम पूर्वानुमान महाशाखाले जनाएको छ । महाशाखाका अनुसार, हाल देशभर सामान्यदेखि पूर्ण बदली रहेको छ भने कोशी, बागमती, कर्णाली र सुदूरपश्चिम प्रदेशका केही स्थानहरूमा हल्का वर्षा भइरहेको छ ।
आज दिउँसो कोशी, बागमती र लुम्बिनी प्रदेशलगायतका पहाडी भूभागहरूमा चट्याङसहित मध्यम वर्षाको सम्भावना छ । साथै, कोशी, बागमती र गण्डकी प्रदेशका पहाडी क्षेत्रका एक–दुई स्थानहरूमा भारी वर्षा हुन सक्ने पूर्वानुमान गरिएको छ । आज राति लुम्बिनी प्रदेशका पहाडी भूभागमा सामान्य बदली रहनेछ भने बाँकी तराई क्षेत्रहरूमा आंशिक बदली रहने जनाइएको छ। पहाडी क्षेत्रका केही स्थानहरूमा र तराईका एक–दुई स्थानमा चट्याङसहित मध्यम वर्षा हुन सक्ने सम्भावना छ।
कोशी, बागमती र गण्डकी प्रदेशका पहाडी भूभागमा भारी वर्षाको सम्भावना रहेकाले महाशाखाले बाढी, पहिरो तथा सतर्कता अपनाउन सम्बन्धित निकाय र सर्वसाधारणलाई अनुरोध गरेको छ।
