- २३ बैशाख २०८३, बुधबार / May 6, 2026
काठमाडौँ, १२ फागुन । मन्त्रिपरिषद् बैठकले जेनजी परिषद् गठन गर्ने, चीन सरकारबाट प्राप्त हुने ४ मिलियन अमेरिकी डलर बराबरको अनुदान सहायता स्वीकार गर्ने तथा प्रतिनिधिसभा निर्वाचनका लागि तीन दिन सार्वजनिक बिदा दिने निर्णय गरेको छ ।
सरकारका प्रवक्ता एवं गृहमन्त्री ओमप्रकाश अर्यालका अनुसार मंगलबार सम्पन्न मन्त्रिपरिषद् बैठकले जेनजी परिषद् गठन गर्ने औपचारिक निर्णय गरेको हो । बैठकले प्रतिनिधिसभा निर्वाचनका लागि चीन सरकारबाट प्राप्त हुने प्रस्तावित ४ मिलियन अमेरिकी डलर नगद अनुदान सहायता स्वीकार गर्ने निर्णय पनि गरेको छ । उक्त सहायता निर्वाचन व्यवस्थापन तथा सम्बन्धित कार्यमा उपयोग गरिने जनाइएको छ ।
त्यसैगरी चालु आर्थिक वर्षको विनियोजित बजेट तथा कार्यक्रमअनुसार बुढीगण्डकी जलाशययुक्त जलविद्युत आयोजनाको वित्तीय लगानी ढाँचा स्वीकृत गर्ने निर्णय गरिएको छ । मन्त्रिपरिषद्ले काठमाडौँ जिल्ला अदालतका जिल्ला न्यायाधीश डा दिवाकर भट्टलाई काठमाडौँ जिल्ला अदालतको कामसमेत हेर्ने गरी उपभोक्ता अदालत काठमाडौँको अध्यक्ष तोक्ने निर्णय पनि गरेको छ ।
यसैगरी बिमा ऐन २०७९ को दफा १४० बमोजिमका कसुरसम्बन्धी मुद्दाको कारबाही र किनारा गर्न जिल्ला अदालतलाई तोक्ने तथा विक्रम संवत् २०८३ साल वैशाख १ गतेदेखि चैत्र मसान्तसम्मका लागि सार्वजनिक बिदा निर्धारण गर्ने निर्णयसमेत गरिएको छ ।
प्रतिनिधिसभा निर्वाचनलाई लक्षित गर्दै फागुन २० देखि २२ गतेसम्म सार्वजनिक बिदा दिने निर्णय पनि मन्त्रिपरिषद्ले गरेको छ । निर्वाचन आयोगको सिफारिसअनुसार उक्त निर्णय गरिएको हो । प्रतिनिधिसभा निर्वाचन फागुन २१ गते देशभर सञ्चालन हुँदैछ ।
सरकारले गरेका यी निर्णयहरूलाई आगामी निर्वाचन व्यवस्थापन, ऊर्जा क्षेत्रको लगानी संरचना र प्रशासनिक सुधारसँग जोडेर हेरिएको छ ।
