- ३१ असार २०८३, बुधबार / Jul 15, 2026
नगरकोट । नगरकोटमा सञ्चालित शुक्रबारे हाटबजारबारे आपसी सहयोग केन्द्र काभ्रे शाखाले छलफल गरेको छ । शुक्रबारे हाटबजारबारे नगरकोटका होटल व्यवसायीहरु र मण्डनदेउपुर नगरपालिकाका नगर प्रमुखसंग आपसी सहयोग केन्द्र काभ्रे शाखाले शुक्रबार होटल ग्रीन भ्यालीमा छलफल गरेको हो ।
छलफल कार्यक्रममा मण्डनदेउपुर नगरपालिका प्रमुख टोक बहादुर वाइबाले नगरकोटका होटल व्यवसायीहरुले किसानले दुःख गरी फलाएको तरकारीलाई प्राथमिकता नदिएको भन्दै गुनासो व्यक्त गर्नुभयो । उहाँले किसानले फलाएको अर्गानिक तरकारी किनेर किसानलाई उत्साहित पार्न व्यवसायीहरुलाई आग्रह समेत गर्नुभयो ।
नगरकोटमा तरकारी संकलन केन्द्र मात्रै नभई नगरपालिकाले तरकारी एम्बुलेन्स समेतको अवधारणा अघि बढाएको नगर प्रमुख वाइबाले जानकारी दिनुभयो । कार्यक्रममा चाँगुनारायण नगरपालिकाको वडा नम्बर ६ ले शुक्रबार हाट बजार सञ्चालन गर्न ठाउँ उपलब्ध गराएकोबारे उपस्थित सबै वडा अध्यक्ष तथा होटल व्यवसायीहरुले प्रसंशा गरेका थिए ।
कार्यक्तममा काभ्रेको मण्डनदेउपुर नगरपालिका वडा नं ३ का वडा अध्यक्ष पुरुषोतम बजगाई, वडा नं ४ का वडा अध्यक्ष मैते सिं तामाङ र भक्तपुरको चाँगुनारायण नगरपालिका वडा नं ६ का वडा अध्यक्ष धन बहादुर लामालगायतले हाटबजार व्यवस्थापन र किसानका समस्याबारे आ–आफ्नो धारणा राखेका थिए ।
आपसी सहयोग केन्द्र काभ्रे शाखाले सञ्चालन गरेको कार्यक्रममा नगरकोटका होटल व्यवसायीहरुले आफ्नै आगनमा तरकारी किन्न पाउँदा खुशी लागेको प्रक्रिया दिए । उनीहरुले तकारी किन्न जाँदा तरकारीका परिकारहरु नपाइएको गुनासो गर्दै किसानहरुलाई तरकारीका विभिन्न परिकारहरु उत्पादनमा जोड दिन आग्रह गरे ।
कार्यक्रममा आपसी सहयोग केन्द्र काभ्रे शाखाका अध्यक्ष बद्री माकले व्यवसायीहरुलाई किसानले तरकारीका जति परिकारहरु उत्पादन गरेका छन् किसालाई उत्साहित गर्न ती सबै परिकारहरु किनिदिन आग्रह गर्नुभयो ।
उहाँले होटलका लागि चाहिनेजति तरकारी उत्पादन नभए पनि कर्मचारीका लागि मात्रै भएपनि तरकारी किनेर किसानलाई उत्साहित पार्न व्यवसायीहरुलाई सुझाउनुभयो ।
छलफल कार्यक्रममा आपसी सहयोग केन्द्र काभ्रेका कार्यक्रम प्रमुख प्रल्हाद तिमिल्सिना र वीत्त प्रमुख सुनिता तामाङले पनि आफ्नो धारणा राख्नु भएको थियो ।
