- २९ श्रावण २०८३, शुक्रबार / Aug 14, 2026
दाङ, १८ साउन । लमही–घोराही सडकखण्डअन्तर्गत पर्ने मसोट खोला पुलको आकस्मिक मर्मत कार्यका कारण चार दिनका लागि सवारी आवागमन बन्द हुने भएको छ ।
पुलको अवस्था जीर्ण बनेपछि जिल्ला प्रशासन कार्यालय दाङमा बसेको सर्वपक्षीय बैठकले साउन २१ गते बिहान ७ बजेदेखि साउन २४ गते बिहान ७ बजेसम्म दुई पाङ्ग्रे बाहेक सबै प्रकारका सवारी साधनको आवागमन पूर्ण रूपमा रोक्ने निर्णय गरेको हो । सडक डिभिजन कार्यालय दाङले सो अवधिमा पुलको मर्मत कार्य सम्पन्न गर्ने तयारी गरेको छ ।
मर्मत अवधिभर यात्रु र सवारी चालकहरूलाई अर्जुनखोला–अमेलिया–तुलसीपुर–घोराही मार्ग प्रयोग गर्न जिल्ला ट्राफिक प्रहरी कार्यालय घोराहीले अनुरोध गरेको छ। ट्राफिक व्यवस्थापन र सुरक्षाका लागि आवश्यक प्रबन्ध मिलाइने ट्राफिक कार्यालयले जनाएको छ ।
साथै, अत्यावश्यक सवारी साधनका लागि वैकल्पिक डाइभर्सन मार्ग मर्मत गरी सञ्चालनमा ल्याइने जनाइएको छ। सो मार्ग सडक डिभिजन कार्यालयले मर्मत गर्नेछ भने ट्राफिक प्रहरीको समन्वयमा व्यवस्थापन गरिने बताइएको छ।
