- ३१ आश्विन २०८३, शनिबार / Oct 17, 2026
एजेन्सी । इजरायललाई गाजामा चिकित्सा सहायता आपूर्तिमा प्रतिबन्ध हटाउन विश्व स्वास्थ्य सङ्गठन (डब्ल्यूएचओ)ले आग्रह गरेको छ ।
गाजाको युद्ध क्षेत्रमा झन्डै सात सय जना गम्भीर बिरामी फसेका बताउँदै चिकित्सा सहायता सामग्रीको अभावलाई तत्काल सम्बोधन गर्न विश्वस्वास्थ्य संगठनका प्रमुख टेड्रोस एड्हानोम गेब्रेयससले विश्व समुदायलाई आग्रह गरेका हुन ।
उत्तरी गाजामा दुई वटा मात्र अस्पतालले सेवा प्रवाह गरिरहेको तर त्यो सेवा अपुग देखिएकोले स्वास्थ्य सेवा प्रदान गर्ने वातावरण बनाउन सम्बन्धित सबैको ध्यान जानुपर्ने टेड्रोसले बताएका छन् । इजिप्टबाट गाजामा प्रवेश गर्ने सीमा क्षेत्र दुई हप्तादेखि बन्द हुँदा गाजामा आपत्कालीन स्वास्थ्य आपूर्तिका लागि प्राथमिक पाइपलाइन समेत काटिएको डब्ल्यूएचओ प्रमुख गेब्रेयससले जेनेभामा पत्रकार सम्मेलनमा बताउनुभएको हो ।
गाजामा कहालीलाग्दो अवस्था रहेको बताउँदै गाजाको अस्पताल परिसर र वरपरका क्षेत्रमा देखिएको तनावले यहाँको चिकित्सा सेवा क्षमतालाई प्रभावित गरेको र बिरामीलाई अस्पतालको पहुँचसम्म पुग्न गाह्रो बनाएको उनले उल्लेख गरेका छन् ।
