- १६ जेष्ठ २०८३, शनिबार / May 30, 2026
काठमाडौं । आपत्तिजनक अभिव्यक्तिका कारण तत्कालीन समाजवादी पार्टीकी सांसद सरिता गिरीको राजनीति सकियो उदाहरणलाई चौका दिने गरी नेकपा (एकीकृत समाजवादी)का उपमहासचिव मेटमणि चौधरीले फेरि उस्तै विवादास्पद अभिव्यक्तिमा फसेका छन् ।
एक टेलिभिजन अन्तर्वार्तामा उनले लिपुलेक, लिम्पियाधुरा र कालापानीमा भारतको दाबी पुग्छ भन्ने अभिव्यक्ति दिएपछि प्रतिनिधिसभा सदस्यसमेत रहेका चौधरीको पद नै धरापमा परेको छ । भदौ २५ गते चौधरीले महाकाली सन्धिपछि भारतले कालापानी क्षेत्रमा आफ्नो दाबी गर्न थालेको जिकिर गरेका हुन् ।
उनले लिपुलेक, लिम्पियाधुरा र कालापानी भारतले लिनसक्ने बताएका थिए । यही अभिव्यक्तिका कारण अहिले मेटमणिको पनि सरिताजस्तै चरम विवादमा तानिएका छन् । आफ्नो जिब्रोमा लगाम लगाउन नसक्दा उनी विवादमा मात्रै फुसेका छैनन्, सांसद र उपमहासचिव पद नै धरापमा पर्न गएको छ।
राष्ट्र र राष्ट्रियताविरुद्ध अभिव्यक्ति दिएको भन्दै सरिताजस्तै मेटमणिलाई पनि कारबाही गर्नुपर्ने आवाज अहिले उठ्न थालेको छ । बेलगाम बोलीमा लगाम लगाउन नसक्दा उनीमाथि कारबाही गर्न एकीकृत समाजवादीलाई दबाब परेको छ ।
