मनसुनजन्य घटनामा परी एकै दिन १६ जनाको मृत्यु, २ बेपत्ता

काठमाडौं । राष्ट्रिय विपद जोखिम न्युनिकरण तथा व्यवस्थापन प्राधिकरणका अनुसार बाढी, पहिरो र चट्याङमा परी एकै दिन १६ जनाको ज्यान गएको छ ।

पहिरोमा परी ८ जनाको मृत्यु भएको छ भने ७ जना घाइते भएका छन्। पहिरोमा परेर सबैभन्दा धेरै लमजुङमा ५ जनाको ज्यान गएको छ। यस्तै कास्कीमा २ तथा संखुवासभामा १ जनाको मृत्यु भएको छ।

चट्याङबाट ७ जनाको मृत्यु र तीन जना घाइते भएका छन्। ओखलढुंगाको चिसंखुगढी गाउँपालिका ५ सेर्ना थुम्कीमा पहिरोमा परी घाइते भएका २ जनालाई हेलिकप्टरमार्फत उपचारका लागि काठमाडौँ ल्याइएको प्राधिकरणले जनाएको छ।

बाढीमा परी मोरङमा १ जनाको मृत्यु भएको छ भने २ जना बेपत्ता तथा एक जना घाइते छन्।

झापा र रोल्पामा दुई।दुई तथा सुनसरीमा १ जनाको चट्याङले मृत्यु भएको हो। चट्याङ लागेर कैलालीमा पनि आज बिहान दुई जनाको ज्यान गएको छ।