- ४ जेष्ठ २०८३, सोमबार / May 18, 2026
प्रतिनिधिसभा चुनावमा उम्मेदवारी दर्ता उत्साहजनक
अघिल्लो चुनावको तुलनामा एक हजार ७५ बढी उम्मेदवार
१६५ वटै निर्वाचन क्षेत्रमा ३ हजार ४८७ उम्मेदवार
राजनीतिक दल र स्वतन्त्र दुवैतर्फ उम्मेदवारी वृद्धि
युवाको सहभागिता उल्लेख्य रूपमा बढेको आयोगको अनुमान
काठमाण्डौ, माघ ८ । फागुन २१ गते हुने प्रतिनिधिसभा सदस्य निर्वाचनमा उम्मेदवारी दर्ता गराउनेको सङ्ख्या अघिल्लो प्रतिनिधिसभा सदस्य निर्वाचनको तुलनामा उल्लेख्य रूपमा बढेको निर्वाचन आयोगले जनाएको छ ।
निर्वाचन आयोगका अनुसार अस्ति मङ्गलवार १६५ वटै निर्वाचन क्षेत्रमा कुल तीन हजार चार सय ८७ जनाले उम्मेदवारी दर्ता गराएका छन् । २०७९ सालको प्रतिनिधिसभा निर्वाचनमा भने दुई हजार चार सय १२ जनाले मात्र मनोनयन पत्र दर्ता गराएका थिए । यस आधारमा यसपटक अघिल्लो चुनावभन्दा एक हजार ७५ जना बढी उम्मेदवार रहेका छन् ।
यस वर्ष ६८ वटा राजनीतिक दलबाट दुई हजार दुई सय ९७ जनाले उम्मेदवारी दर्ता गराएका छन् । तीमध्ये दुई हजार ६४ पुरुष र दुई सय ३५ महिला रहेका छन् । यस्तै, स्वतन्त्रतर्फ उम्मेदवारी दिने एक हजार एक सय ८७ जना छन् । स्वतन्त्र उम्मेदवारमध्ये एक हजार २४ पुरुष र एक सय ६० महिला रहेको निर्वाचन आयोगका सहायक प्रवक्ता कुलबहादुर जिसीले जानकारी दिनुभयो ।
उमेर समूहका आधारमा उम्मेदवारी दर्ता गराउनेमध्ये २५ देखि ३५ वर्ष उमेर समूहका पाँच सय ८३ जना छन् । ३६ देखि ५० वर्ष उमेर समूहका एक हजार ६१०, ५१ देखि ६५ वर्ष उमेर समूहका एक हजार ९० तथा ६५ वर्षभन्दा माथिका दुई सय एक जना उम्मेदवार रहेका छन् ।
निर्वाचन आयोगले सुशासनलाई मुख्य नारा बनाएर भएको नवयुवा आन्दोलनपछि युवाहरूको राजनीतिक सहभागिता बढेकाले उम्मेदवारी दर्ता गर्ने युवाको सङ्ख्या पनि वृद्धि भएको अनुमान गरेको छ ।
