थिमि बाल सुधारगृहको अवस्था सामान्य, सुरक्षा थप कडा

भक्तपुर, ९ माघ । सानोथिमि स्थित बाल सुधारगृहको अवस्था अहिले सामान्य बनेको छ । तर सुरक्षाका लागि थप प्रहरी परिचालन गरिएको छ ।

बिहीबार राति सुधारगृहमा दुई समूहबीचको झडपले यहाँको अवस्था तनावग्रस्त बनेको थियो । झडप नियन्त्रणका लागि थिमि प्रहरी वृत्तका प्रमुखको नेतृत्वमा टोली परिचालन गरिएको थियो । तर प्रहरीमाथि ढुङ्गा प्रहार समेत भएको प्रहरीले जनाएको छ ।

सुधारगृहमा भएको झडप आगजनी र तोडफोडमा परिणत भयो । आगो नियन्त्रण गर्न मध्यरातमा भक्तपुर र काठमाडौँका वारुणयन्त्र प्रयोग गरिएको थियो । सुधारगृहमा हाल १४५ पुरुष र २४ महिला गरी जम्मा १६९ जना रहेका छन् ।