- १ आश्विन २०८३, बिहीबार / Sep 17, 2026
काठमाडौं । ओमान पुगेका ८० जनाभन्दा धेरै अफगानी महिला समस्यामा परेका छन् । तालिबानबाट भागेर उच्च शिक्षाका लागि त्यहाँ पुगेका अफगानी महिला समस्यमा परेका हुन ।
उनीहरूले आफूहरूको सुरक्षा र शिक्षाको निरन्तरताका लागि तत्काल व्यवस्थासहित सुरक्षा दिनसक्ने देशमा पुनर्वासको माग गरेका छन् । अमेरिकी राष्ट्रपति डोनाल्ड ट्रम्पले विदेशी सहायता रोकेपछि आफूहरू स्वदेश फर्कनुपर्ने अवस्था आएको उनीहरूको गुनासो छ ।
झन्डै चार वर्षअघि पुनः सत्तामा फर्किएपछि तालिबानले अफगानिस्तानमा महिलाहरूमाथि कठोर प्रतिबन्ध लगाएको छ जसमा उनीहरूलाई विश्वविद्यालयबाट प्रतिबन्ध लगाउनु पनि समावेश छ ।
ट्रम्प प्रशासनको सहायता रोक्काले कानूनी अवरोधहरूको सामना गर्नुपरेको छ तर ह्वाइट हाउसले यूएसएआईडीलाई खारेज गर्दै दशौं अर्ब डलरको खर्च कटौती गरेपछि विश्वभर हजारौं मानवीय कार्यक्रमहरू पहिले नै समाप्त भइसकेका छन् ।
तालिबानको प्रतिबन्धका बीच शिक्षाकै लागि भागेका उनीहरू स्वदेश फर्किएमा सुरक्षित नहुने र पढाइसमेत रोकिने चिन्तामा छन् । उनीहरूले अमेरिकी अन्तर्राष्ट्रिय विकास नियोग (यूएसएआईडी) को छात्रवृत्तिमा अध्ययन गरिरहेका थिए ।
