- २० कार्तिक २०८३, शुक्रबार / Nov 6, 2026
काठमाडौँ, २८ असाेज । वर्षा, बाढी र पहिरोका कारण अवरुद्ध बनेको म्याग्दीको अन्नपूर्ण गाउँपालिका र मुस्ताङको विद्युत् आपूर्ति नियमित गरिएको छ । विद्युत् प्रसारण तथा वितरण लाइनमा आएको समस्या समाधान गर्न मर्मत कार्य अघि बढाएपछि आपूर्ति पुनः सञ्चालनमा आएको हो ।
असोज ८ देखि ११ गतेसम्म भएको भारी वर्षाका कारण कालीगण्डकी नदीमा बाढी आउँदा म्याग्दीको अन्नपूर्ण गाउँपालिकाअन्तर्गत पोखरेबगर, धिरच्याङ र दोवाको भिरकाटे क्षेत्रमा २२० केभी क्षमताको दाना–खुर्कोट प्रसारण लाइनका चार वटा टावर ढलेका थिए । बाढीले प्रसारण लाइनसमेत चुँडाएपछि मुस्ताङ जिल्ला र अन्नपूर्ण गाउँपालिकामा विद्युत् आपूर्ति अवरुद्ध भएको थियो ।
नेपाल विद्युत् प्राधिकरणको तातोपानी वितरण केन्द्रका प्रमुख हेमराज चापागाईंका अनुसार प्रसारण लाइनमा क्षति पुगेपछि दाना सबस्टेसनबाट तत्काल विद्युत् आपूर्ति गर्न सम्भव नभएकाले वैकल्पिक व्यवस्था गरेर आपूर्ति सञ्चालन गरिएको हो ।
केन्द्रका प्रमुख चापागाईंले मुस्ताङमा यसअघि नै विद्युत् आपूर्ति नियमित भइसकेको र म्याग्दीको अन्नपूर्ण गाउँपालिकामा एक–दुई घरबाहेक अन्य सबै ठाउँमा मर्मत कार्य सम्पन्न भएको जानकारी दिए ।
विद्युत् आपूर्ति पुनः सञ्चालन भएसँगै अवरुद्ध सञ्चार सेवा पनि सञ्चालनमा आएको छ । यसबाट प्रभावित क्षेत्रका स्थानीय बासिन्दालाई राहत पुगेको छ ।
यसैबीच, म्याग्दीमा रहेका ४२ मेगावाट क्षमताको मिस्त्रीखोला, ११० मेगावाटको नीलगिरि, ६ मेगावाटको रेलेखोला र १४ मेगावाट क्षमताको घारखोला जलविद्युत् आयोजना भने अझै बन्द रहेका छन् ।
