- १९ आश्विन २०८३, सोमबार / Oct 5, 2026
मुस्ताङ–पोखरा उडानमा नेपाली यात्रुले टिकट नपाएको गुनासो बढ्यो ।
विदेशी पर्यटकलाई बढी भाडा पाइने भएकाले एयरलाइन्सले उनीहरूलाई प्राथमिकता दिएको स्थानीयको आरोप ।
सडक अवरुद्ध भएपछि मुस्ताङका नागरिक हवाई सेवामा निर्भर हुन बाध्य ।
प्रशासनले प्रत्येक उडानमा कम्तीमा दुई जना नेपाली यात्रुलाई अनिवार्य लैजानुपर्ने नियम बनायो ।
नियम पालना नगरे एयरलाइन्सविरुद्ध थप हस्तक्षेप गर्ने स्थानीय प्रशासनको चेतावनी ।
पोखरा, १९ असाेज । सडक सञ्जाल अवरुद्ध भएपछि मुस्ताङ–पोखरा आउजाउका लागि हवाई सेवा महत्वपूर्ण बने पनि नेपाली यात्रुले जहाजको टिकट नपाएको गुनासो बढेको छ । मुस्ताङबाट पोखरा जाने उडानमा एयरलाइन्सहरूले विदेशी पर्यटकलाई प्राथमिकता दिएको भन्दै स्थानीयले आपत्ति जनाएका छन् ।
आकस्मिक कामका लागि पोखरा आउन खोजेका मुस्ताङ पत्रकार महासंघका सचिव आदित्य रसाइलीले समेत पटक–पटक आग्रह गर्दा समिट र तारा एयरमा टिकट नपाएको बताउनुभयो । इसेवामार्फत टिकट खोज्दा करिब १२ हजार रुपैयाँ भाडा देखिए पनि नेपाली यात्रुका रूपमा टिकट उपलब्ध नगराइएको उहाँको गुनासो छ ।
रसाइलीका अनुसार मुस्ताङ–पोखरा रुटमा नेपालीका लागि वास्तविक भाडादर करिब ४ हजार ८ सय रुपैयाँ भए पनि अनलाइन प्रणालीमा महँगो दर देखिने गरेको छ । महँगो भाडा तिर्न तयार हुँदा पनि नेपाली यात्रुलाई टिकट नदिइएको उहाँको भनाइ छ । सडक सञ्जाल अवरुद्ध भएपछि बिरामी, अशक्त तथा आकस्मिक काम परेका नागरिकसमेत समस्यामा परेका छन् । असोज ९ गतेदेखि परेको अविरल वर्षाका कारण म्याग्दी र पर्वतका विभिन्न स्थानमा सडक क्षतिग्रस्त भएपछि मुस्ताङको सडक सम्पर्क प्रभावित भएको हो ।
मुस्ताङमा तारा एयर र समिट एयरले नियमित हवाई उडान गर्दै आएका छन् । तर, नेपाली यात्रुको तुलनामा विदेशी पर्यटकबाट बढी भाडा प्राप्त हुने भएकाले एयरलाइन्सले विदेशीलाई प्राथमिकता दिएको स्थानीयको आरोप छ । मुस्ताङका सहायक प्रमुख जिल्ला अधिकारी एकनारायण भण्डारीका अनुसार नेपाली यात्रुलाई टिकट नदिएको गुनासो बढेपछि जिल्ला प्रशासन कार्यालयले हस्तक्षेप गरेको छ ।
जिल्ला विपद् व्यवस्थापन समितिको बैठकबाट जोमसोम विमानस्थलबाट हुने प्रत्येक उडानमा कम्तीमा दुई जना नेपाली नागरिकलाई अनिवार्य रूपमा लैजानुपर्ने व्यवस्था गरिएको उहाँले बताउनुभयो । प्रशासनले बिरामी, असहाय तथा आकस्मिक समस्यामा परेका नागरिकलाई प्राथमिकताका आधारमा छनोट गरी एयरलाइन्समा पठाउने गरेको छ । भण्डारीका अनुसार विपद्को अवस्थामा समेत एयरलाइन्सले नाफालाई मात्र प्राथमिकता दिएको गुनासो आएपछि प्रशासनले यस्तो व्यवस्था गरेको हो ।
हाल जोमसोम विमानस्थलबाट तारा एयर र समिट एयरले दैनिक औसत १० वटा उडान गर्दै आएका छन् । एयरलाइन्सले प्रशासनको आग्रहसमेत बेवास्ता गरेपछि पर्यटन मन्त्रालयमा समेत जानकारी गराइएको प्रशासनले जनाएको छ । एक कर्मचारीका अनुसार एक एयरलाइन्सले बिरामी यात्रुलाई लैजान अस्वीकार गरेपछि पर्यटन मन्त्रालयका सहसचिवलाई अवस्थाबारे जानकारी गराइएको थियो । मन्त्रालयमा गुनासो गरेपछि मात्रै यात्रु लैजान एयरलाइन्स तयार भएको उनको भनाइ छ ।
घरपझोङ गाउँपालिकाका अध्यक्ष मोहनसिंह लालचनले भने विपद्को समयमा नेपाली नागरिकलाई बेवास्ता गर्ने एयरलाइन्सको प्रवृत्ति नरोकिए विमानस्थलमै विरोध गर्ने चेतावनी दिनुभएको छ । उहाँले संकटको समयमा डलर तथा महँगो भाडा तिर्ने विदेशी र भारतीय पर्यटकलाई मात्र प्राथमिकता दिनु उचित नभएको बताउनुभयो ।
निजी एयरलाइन्स भए पनि विपद्को समयमा नागरिकप्रतिको जिम्मेवारीबाट पन्छिन नहुने उहाँको भनाइ छ । अध्यक्ष लालचनले यस विषयमा प्रधानमन्त्री बालेन्द्र शाहसँग समेत कुरा राख्ने बताउनुभएको छ ।
