- २८ श्रावण २०८३, बिहीबार / Aug 13, 2026
देशभर हालसम्म ४५.८१ प्रतिशत धान रोपाइँ सम्पन्न।
गत वर्षको यही अवधिको तुलनामा करिब १३.४७ प्रतिशतले कम प्रगति।
नेपालमा कुल १३.७० लाख हेक्टर क्षेत्रफलमा धान खेती हुने।
हालसम्म ६.२७ लाख हेक्टर क्षेत्रमा मात्रै रोपाइँ सम्पन्न।
गण्डकी प्रदेशमा सबैभन्दा बढी ६५.९ प्रतिशत रोपाइँ।
कोशी प्रदेशमा सबैभन्दा कम ३१.५ प्रतिशत रोपाइँ।
मौसम र वर्षाको अनियमितताले धान रोपाइँ प्रभावित भएको अनुमान।
काठमाडौँ, २९ असार । यसवर्ष देशभर धान रोपाइँको गति गत वर्षको तुलनामा सुस्त देखिएको छ। कृषि विभागका अनुसार असार २६ गतेसम्म देशभर कुल ४५.८१ प्रतिशत धान रोपाइँ मात्रै सम्पन्न भएको छ।
विभागले सार्वजनिक गरेको तथ्यांकअनुसार गत वर्ष यही अवधिमा ५९.२८ प्रतिशत धान रोपाइँ सम्पन्न भएको थियो। यस आधारमा यसवर्ष धान रोपाइँको प्रगति गत वर्षको तुलनामा करिब १३.४७ प्रतिशतले कम रहेको देखिएको छ।
नेपालभर कुल १३ लाख ७० हजार ६२ हेक्टर क्षेत्रफलमा धान खेती हुने गरेकोमा हालसम्म ६ लाख २७ हजार ५६६ हेक्टर क्षेत्रफलमा मात्रै रोपाइँ सम्पन्न भएको कृषि विभागले जनाएको छ।
प्रदेशगत विवरणअनुसार यसवर्ष गण्डकी प्रदेशमा सबैभन्दा बढी ६५.९ प्रतिशत क्षेत्रमा धान रोपाइँ सम्पन्न भएको छ। विपरीत रूपमा, कोशी प्रदेशमा सबैभन्दा कम ३१.५ प्रतिशत क्षेत्रमा मात्रै रोपाइँ भएको छ।
धान उत्पादनको प्रमुख क्षेत्र मानिने कोशी र मधेस प्रदेशमा यसपटक रोपाइँको गति निकै सुस्त रहेको विभागको प्रतिवेदनमा उल्लेख छ। कोशी प्रदेशमा २ लाख ७६ हजार ३८७ हेक्टर खेतीयोग्य जमिनमध्ये हालसम्म ८७ हजार ३३ हेक्टर क्षेत्रमा मात्रै धान रोपिएको छ।
कृषि विज्ञहरूका अनुसार निरन्तर वर्षाको अनियमितता, पर्याप्त सिँचाइको अभाव तथा मौसमको प्रतिकूलताले यसवर्ष धान रोपाइँ प्रभावित भएको हुन सक्ने अनुमान गरिएको छ।
