- ३१ असार २०८३, बुधबार / Jul 15, 2026
काठमाडौं । नेपाली सेनाले सफा हिमाल अभियानबाट यस वर्ष ११ हजार किलो फोहोर संकलन गरेको छ। गत चैत २९ गतेदेखि सुरू भएको सफा हिमाल अभियान, २०२४ जेठ २३ गते सम्पन्न भएको हो।
यस वर्ष सगरमाथा, ल्होत्से र नुप्त्से हिमालको सफाइ गरेको थियो। यी हिमालबाट १० हजार किलो फोहोर र ५ वटा मानव शव संकलन गर्ने लक्ष्य लिएको थियो।
त्यस लक्ष्य अनुसार ११ हजार किलो फोहोर, ४ वटा शव र एक मानव अस्थिपञ्जर संकलन भएको नेपाली सेनाको जंगी अड्डास्थित जनसम्पर्क तथा सूचना निर्देशनालयले जनाएको छ।
संकलन गरिएका फोहोरहरूमध्ये २ हजार २२६ किलो फोहोर कुहिने खालका थिए। त्यसैगरी नकुहिने फोहोर ८ हजार ७७४ किलो थियो। सफाइका लागि १२ जना सैनिक र एक जना शर्पासहित १३ जनाको टोली गएको थियो।मानव शव तथा अस्थिपञ्जरहरू नेपाली सेनाले त्रिवि शिक्षण अस्पताल महाराजगञ्जमा बुझाउने गरेको छ।
सन् २०१९ देखि सुरू भएको यो अभियान यस वर्षको अभियान पाँचौं संस्करण रहेको निर्देशनालयले जनाएको छ।
