- ७ असार २०८३, आईतवार / Jun 21, 2026
काठमाडौं । यही मंसिर १६ गते हुने स्थानीय तह उपनिर्वाचनका लागि कीर्तिपुर नगरपालिका र काठमाडौं महानगरपालिका–१६ मा निर्वाचन आयोगले आचारसंहिता अनुगमन टोली खटाएको छ । निर्वाचनलाई स्वच्छ, निष्पक्ष, स्वतन्त्र र भयरहित वातावरणमा सम्पन्न गर्न आयोगले मंसिर २ गतेदेखि नै आचारसंहिता जारी गरेको थियो ।
चुनाव प्रचारप्रसारका क्रममा उक्त आचारसंहिता पालना गरे नरेको अनुगमनका लागि अनुगमन टोली खटाएको हो । कीर्तिपुर नगरपालिकामा नेपाल प्रहरीका एसएसपी दीपक रेग्मी, सशस्त्र प्रहरीका एसपी अशोक न्यौपाने, उपसचिव डा. थानेश्वर भुसाल, उपन्यायाधिवक्ता केदारकुमार अधिकारी खटिएका छन् भने
काठमाडौं १६ मा सहसचिव नारायणप्रसाद सापकोटा, सशस्त्र प्रहरीका एसएसपी दिगविजय सुवेदी, उपसचिव सीता पुन श्रीष र एसपी सञ्जयसिंह थापालाई अनुगमनका खटाइएको प्रवक्ता सहसचिव नीता पोखरेल अर्यालले बताइन् । आचारसंहिता उल्लंघन गरेमा निर्वाचन आयोग ऐन, २०७३ को व्यवस्था अनुसार उम्मेदवारी रद्द गर्ने चेतावनीसमेत आयोगले दिएको छ ।
