- ३१ बैशाख २०८३, बिहीबार / May 14, 2026
दुई दिनमै २७ हजारभन्दा बढी आवेदन
म्यादी प्रहरीका लागि पुस २५ देखि आवेदन सुरु
माघ १ गतेसम्म दरखास्त दिन सकिने
१ लाख ३३ हजार ९८० जना भर्ना गरिँदै
बजेट ७ अर्ब १३ करोड सुनिश्चित
सशस्त्रले पनि १५ हजार ११० जनाको भर्ना गर्दै
काठमाडौँ, २७ पुष । प्रतिनिधिसभा निर्वाचन सुरक्षाका लागि खटाइने निर्वाचन प्रहरी (म्यादी प्रहरी) भर्नाका लागि नेपाल प्रहरीले आवेदन सङ्कलन गरिरहेको छ । पुस २५ गतेदेखि देशभरका जिल्ला प्रहरी कार्यालयबाट आवेदन लिन सुरु गरिएकोमा दुई दिनमै २७ हजारभन्दा बढीले आवेदन दिएका छन् ।
नेपाल प्रहरीका प्रवक्ता (डीआईजी) अबि नारायण काफ्लेले दुई दिनको अवधिमा २७ हजारभन्दा बढी आवेदन सङ्कलन भएको जानकारी दिए । उनका अनुसार दरखास्त दिने म्याद माघ १ गतेसम्म तोकिएको छ ।
नेपाल प्रहरीले यसपटकको निर्वाचनका लागि १ लाख ३३ हजार ९८० जना निर्वाचन प्रहरी भर्ना गर्ने प्रक्रिया सुरु गरेको छ । निर्वाचन प्रहरी भर्ना तथा परिचालनका लागि अर्थ मन्त्रालयले ७ अर्ब १३ करोड रुपैयाँ बजेटको स्रोत सुनिश्चित गरेको छ ।
दरखास्त आह्वानको दोस्रो दिन शनिबार मात्रै करिब १७ हजार जनाले आवेदन दिएको प्रहरी स्रोतले जनाएको छ । यसले निर्वाचन प्रहरीप्रति युवाहरूको आकर्षण बढेको देखाउँछ ।
यसपटक सशस्त्र प्रहरीले पनि निर्वाचन प्रहरीको कोटा पाएको छ । सशस्त्र प्रहरीले जिल्ला सुरक्षा समिति मार्फत आवेदन लिएर भर्ना प्रक्रिया अघि बढाएको छ । सशस्त्र प्रहरीले १५ हजार ११० जना निर्वाचन प्रहरी भर्ना गर्ने जनाएको छ ।
