- ३० चैत्र २०८२, सोमबार / Apr 13, 2026
एजेन्सी । इरानको राजधानी तेहरानसहित विभिन्न सहरहरूमा सरकारविरोधी प्रदर्शन तीव्र बन्दै गएको छ ।
पछिल्लो २४ घण्टामा सुरक्षाकर्मी र प्रदर्शनकारीबीच भएका हिंसात्मक झडपमा परी ५ सयभन्दा बढी व्यक्तिको मृत्यु भएको अधिकारवादी संस्थाहरूले दाबी गरेका छन् ।
प्रदर्शनकारीहरूले बढ्दो महँगी, बेरोजगारी र राजनीतिक दमनको विरोध गर्दै सडकमा उत्रिएका हुन् । यद्यपि इरानी राष्ट्रपति मसुद पेजेस्कियानले आर्थिक सुधार र जनताको जीवनस्तर उकास्ने प्रतिबद्धता जनाए पनि प्रदर्शनकारीहरूले शासन व्यवस्था नै परिवर्तन गर्नुपर्ने माग गर्दै आन्दोलन जारी राखेका छन् ।
यसैबीच, अमेरिकी राष्ट्रपति डोनाल्ड ट्रम्पले इरानको पछिल्लो घटनाक्रमप्रति कडा प्रतिक्रिया जनाएका छन् । उनले सामाजिक सञ्जालमा “चाँडै” भन्ने छोटो तर रहस्यमयी सन्देश लेख्दै इरानी सरकारलाई चेतावनी दिएका छन् । ट्रम्पले इरानी सरकारले नागरिकको हत्या जारी राखेमा अमेरिकाले कडा कदम चाल्ने बताएका छन् ।
उता, तेहरानले भने अमेरिका र इजरायलले इरानको आन्तरिक मामिलामा हस्तक्षेप गरे कडा प्रतिकार गर्ने चेतावनी दिएको छ । इरानी अधिकारीहरूले अमेरिकी सैन्य आधार इलाकाहरूलाई समेत निशाना बनाउन सक्ने बताएका छन् ।
मध्यपूर्वमा बढ्दो यो तनावले विश्व राजनीतिमा नयाँ तरंग पैदा गरेको छ । अन्तर्राष्ट्रिय समुदायले संयमता अपनाउन र हिंसा रोक्न दुवै पक्षलाई आग्रह गरिरहेका छन् ।
