पहिरोमा पुरिएर सात जनाको मृत्यु

काठमाडौं । बझाङ र जाजरकोट पहिरोमा पुरिएर सात जनाको मृत्यु भएको छ । बझाङको बुंगल नगरपालिका १० टुमेडा बस्ने ६२ वर्षीय बिर बहादुर धामीको घर गएराति अविरल वर्षाका कारण पहिरोले पुरिँदा ४ जनाको मृत्यु भएको हो ।

पहिरोमा पुरिएर सोही ठाउँ बस्ने ५५ वर्षीया काली धामी, २५ वर्षीया गोल्की धामी, ६ वर्षीया आकृती धामी र ३ वर्षीया लक्ष्मी धामीको मृत्यु भएको छ । घर बगाउँदा ४ जना बेपत्ता भएको भन्ने खबर प्राप्त हुनासाथ अस्थायी प्रहरी पोष्ट पुतलीलेक र इलाका प्रहरी कार्यालय बुंगलबाट खटिएको प्रहरीले बेपत्ता भएकाहरूको खोजी तथा उद्दारको गर्ने क्रममा चारै जनाको शव फेला परेको हो ।

यसैगरी जाजरकोट नलगाड नगरपालिका २ डाँडागाउँ बस्ने लाल बहादुर परियारको अस्थाई टहरो पहिरोले पुरिँदा ३ जनाको मृत्यु भएको छ । पहिरोले पुरिएर लाल बहादुर, उनकी श्रीमती ३५ वर्षीया मनिषा बिक र छोरा शुभम परियारको मृत्यु भएको हो । प्रहरीले उद्दार गर्ने क्रममा उनीहरूको शव फेला परेको हो ।