- ३० श्रावण २०८३, शनिबार / Aug 15, 2026
एजेन्सी । पाकिस्तान र तालिबान नेतृत्वको अफगान सरकारबीच ४८ घण्टे युद्धविराम गर्ने सहमति भएको छ। सीमा क्षेत्रमा भएको घातक झडपपछि बुधबार साँझ ६ बजेदेखि लागू हुने गरी युद्धविरामको घोषणा इस्लामाबादले गरेको हो।
पाकिस्तानको विदेश मन्त्रालयले विज्ञप्ति जारी गर्दै दुवै देशले जटिल तर समाधान गर्न सकिने मुद्दाहरूलाई संवादमार्फत समाधान गर्ने प्रतिबद्धता जनाएका छन्। तर, यस विषयमा तालिबान सरकारबाट भने तत्काल कुनै आधिकारिक प्रतिक्रिया आएको छैन, रोयटर्सले उल्लेख गरेको छ।
मंगलबार राति दक्षिणपूर्वी अफगानिस्तानको स्पिन बोल्डक र पाकिस्तानको चमन जिल्लाका दुर्गम क्षेत्रमा भएको तीव्र झडपमा दर्जनौँको मृत्यु र सयभन्दा बढी घाइते भएका थिए। तालिबान सरकारका अनुसार झडपमा १२ जना अफगानी नागरिकको मृत्यु र १०० भन्दा बढी घाइते भएका छन्।
स्पिन बोल्डकका प्रेस प्रवक्ता अली मोहम्मद हकमालका अनुसार मृतकको संख्या १५ पुगेको छ। एएफपीले उद्धृत गरेको जिल्ला अस्पताल स्रोतका अनुसार घाइतेमध्ये ८० जना महिला र बालबालिका रहेका छन्।
तालिबान प्रवक्ता जबीउल्लाह मुजाहिदले अफगान सेनाले जवाफी कारबाहीमा पाकिस्तानी सैनिकहरू मारिएको, हतियार र ट्यांकहरू कब्जा गरिएको तथा केही सैन्य प्रतिष्ठान नष्ट गरिएको दाबी गरेका छन्।
