- १ भाद्र २०८३, सोमबार / Aug 17, 2026
बागलुङ । बागलुङ नगरपालिका–१३ पैयुँपाटास्थित त्रिभुवन माध्यमिक विद्यालयमा अध्ययनरत विद्यार्थी पञ्चेबाजा संरक्षणमा जुटेका छन् । कक्षा २ देखि १० सम्मका छात्रछात्रा अतिरिक्त अध्ययनका लागि विद्यालयमा बाजा बजाउने कला सिकिरहेका छन् । हालै विद्यालयले आफ्नो ७४औँ वार्षिकोत्सव मनाउँदा बालबालिकाहरुले पञ्चेबाजा बजाएका थिए ।
शिक्षक थमबहादुर परियारले विद्यार्थीलाई बाजा बजाउन सिकाइरहेका छन् । बिदाको समयमा सिकाउने गरेका छन् । कक्षा ९ का विराज परियार सनाई, कक्षा २ का बिहान परियार ढोलक, कक्षा ५ का आयुस परियार र कक्षा ७ का पृथ्वी परियारले ट्याम्को बजाउँदै आएका छन् । कक्षा १० कि रेश्नुका परियार झ्याली बजाउँछिन् । कक्षा ४ मा अध्ययन रतदिप्सन परियार र कक्षा ६ मा पढ्ने सक्षम परियारले कर्नाल बजाउने गरेका छन् ।
कक्षा ३ मा अध्ययनरत आयन परियार र कक्षा ४ मा अध्ययनरत बिहान परियार (ख)ले दमाहा बजाउने गरेका छन् । घरमा राखेको बेलामा बजाउँन सिकेको शिक्षक थमबहादुरले बताए । पछिल्लो सयम गाउँमा बाजा बजाउनेको सङ्ख्या नपुग्ने भन्दै साना विद्यार्थीले बजाउन थालेपछि पञ्चेबाजा संरक्षणमा आशा जागेको छ । बाजा बजाउने परम्परागत चलन भएको हुँदा आफूहरूले सिकेको रेश्नु परियारले बताइन् ।
सानैदेखि वरपरका साथीसँग मिलेर बजाएको सुनाउँदै अहिले घरमा राखेका बाजा लिएर विद्यालयको कार्यक्रममा बजाउने गरेको उनको भनाइ छ । सीप र ताल मिले जसले पनि बाजा बजाउन सक्ने बताइन् । अहिले साना भाइबहिनीले पनि धेरै रुचि राखेका छन् । विद्यालयमा बाजा बजाउने अधिकांश ६ देखि १५ वर्ष उमेर समूहका विद्यार्थी छन् । विद्यार्थीलाई बाजा बजाउन प्रेरित गर्नका लागि प्रधानाध्यापक तिलक आचार्यले पञ्चेबाजा सङ्कलन अभियानसमेत सुरु गरेको बताए ।
