सार्वजनिक गाडी बन्द हुँदा यात्रुहरू अलमलमा

काठमाडौँ, १९ जेठ । गण्डकी प्रदेशले राइड सेयरिङलाई कानुनी मान्यता दिएपछि यसको विरोधमा यातायात व्यवसायीहरूले सोमबार देशभर सार्वजनिक सवारी बन्द गरे ।

यसको प्रत्यक्ष असर यात्रुहरूमा देखियो। त्रिभुवन विमानस्थलदेखि चावहिल, स्वयम्भू, बसपार्क, जावलाखेललगायत स्थानमा यात्रुहरू गाडी कुर्दै अलमलमा परेका थिए। धेरैले महँगोमा राइड सेयरिङ वा ट्याक्सी प्रयोग गरे भने केही पैदल हिँड्न बाध्य भए।

विमानस्थलमा मलेशियाबाट फर्किएका लालसिंह दोङले गन्तव्यसम्म जान गाडी नपाएको गुनासो गरे। यात्रुहरूले राइड सेयरिङ र ट्याक्सी चालकहरूले दोब्बर भाडा असुल गरेको बताए।

साझा र केही माइक्रोबस चले पनि पर्याप्त नभएर यात्रुहरू सास्तीमा परेका छन्। यात्रुहरूको पीडा समाधान गर्न सरकारले चाँडै समन्वयात्मक नीति ल्याउनुपर्ने देखिएको छ।