रवि लामिछानेलाई रूपन्देही लगिदै, थप १३ दिन हिरासत राख्न अनुमति

काठमाडौं । राष्ट्रिय स्वतन्त्र पार्टीका सभापति रवि लामिछानेलाई प्रहरीले आज रुपन्देही लैजाने तयारी गरेको छ । सहकारी ठगी प्रकरणमा पक्राउ परेका उनी २४ दिनदेखि कास्की प्रहरीको हिरासतमा छन् ।

लामिछानेलाई हिजो कास्की जिल्ला अदालतले थप १३ दिन हिरासत राख्न अनुमति दिएपछि आज रुपन्देही लैजाने तयारी गरेको हो । पोखरा सूर्यदर्शन सहकारीको रकम हिनामिनामा संलग्न रहेको आरोपमा पक्राउ परेका लामिछानेमाथि बुटवलमा रहेको सुप्रिम सहकारीको रकम समेत हिनामिनामा संलग्न आरोप छ ।

सोही सहकारीको रकम हिनामिनाको विषयमा अनुसन्धानका लागि उनलाई पक्राउ गर्न रुपन्देही जिल्ला अदालतले अनुमति दिइसकेको छ । प्रहरीसँगको समन्वयमा सोमबार साँझको जहाजबाट भैरहवा ल्याइने गरी प्रक्रिया अगाडि बढाइएको छ। आज साँझसम्म प्रक्रिया ढिला भए भोलि बिहानको उडानबाट भैरहवा लैजाने तयारी छ।