- १९ भाद्र २०८३, शुक्रबार / Sep 4, 2026
रसुवाको भोटेकोसीमा आएको बाढीपछि विभिन्न देश तथा अन्तर्राष्ट्रिय संस्थाबाट सहयोग जारी छ ।
भारतले पाँच चरणमा ७४ टन राहत तथा उद्धार सामग्री उपलब्ध गराइसकेको छ ।
चीनले ३० करोड रुपैयाँ र ५० टन राहत सामग्री सहयोग गरेको छ ।
पाकिस्तानबाट ८६ टन राहत सामग्री प्राप्त हुँदैछ ।
यूएईले ८३ टन राहत सामग्री उपलब्ध गराएको छ र थप १ करोड अमेरिकी डलरसम्म सहयोग गर्ने प्रतिबद्धता जनाएको छ ।
बेलायत, युरोपेली सङ्घ, अमेरिका, अष्ट्रेलिया, स्विट्जरल्याण्डलगायत देशले आर्थिक सहयोगको घोषणा गरेका छन् ।
विभिन्न देशले उद्धार तथा राहतका लागि विशेषज्ञ टोली र आवश्यक उपकरणसमेत पठाइरहेका छन् ।
काठमाडौं, १९ भदौ । रसुवाको भोटेकोसीमा भदौ १० गते आएको विनाशकारी बाढीपछि नेपाललाई विभिन्न देश तथा अन्तर्राष्ट्रिय क्षेत्रबाट राहत तथा उद्धार सहयोग प्राप्त हुने क्रम जारी छ ।
प्रधानमन्त्री तथा मन्त्रिपरिषद्को कार्यालयका अनुसार बाढी आएको पहिलो दिनदेखि नै विभिन्न देशबाट सहयोग आउन थालेको हो । प्रभावित क्षेत्रमा उद्धार तथा राहतका लागि आवश्यक सामग्रीसँगै आर्थिक सहयोग र विशेषज्ञ टोलीसमेत परिचालन भइरहेका छन् ।
भारतले विभिन्न चरणमा नेपाललाई सहयोग गरिरहेको छ । भारतले हालसम्म पाँच चरणमा ७४ टन राहत तथा उद्धार सामग्री उपलब्ध गराइसकेको छ । साथै, उद्धारका लागि आवश्यक विशेषज्ञ टोलीसमेत प्रभावित क्षेत्रमा परिचालन गरेको छ ।
चीनले नेपाललाई ३० करोड रुपैयाँ र ५० टन राहत सामग्री उपलब्ध गराएको छ । प्रभावित क्षेत्रमा आवश्यक पर्ने पूर्वाधार सहयोगअन्तर्गत नेपाल सरकारले चीनसँग ३० वटा बेलीब्रिज उपलब्ध गराउनसमेत अनुरोध गरेको छ ।
पाकिस्तानबाट ८६ टन राहत सामग्री प्राप्त हुने क्रममा रहेको छ । श्रीलङ्काले १० लाख अमेरिकी डलर सहयोग गर्ने प्रतिबद्धता जनाएको छ भने बङ्गलादेशले पनि राहत सामग्री पठाउने तयारी गरेको छ ।अमेरिकाले ५ लाख अमेरिकी डलर सहयोग गर्ने प्रतिबद्धता जनाएको छ । अष्ट्रेलियाले १० लाख अमेरिकी डलर नगद सहयोग गर्ने घोषणा गर्नुका साथै विशेषज्ञ तथा ड्रोन अपरेटरसहितको टोली नेपाल पठाउने तयारी गरेको छ ।
संयुक्त अरब इमिरेट्स (यूएई)ले ८३ टन अत्यावश्यक राहत सामग्री उपलब्ध गराइसकेको छ । उसले थप १ करोड अमेरिकी डलरसम्म सहयोग गर्ने प्रतिबद्धता जनाएको छ । कतारले पनि ४० टन राहत सामग्री उपलब्ध गराएको छ ।बेलायतले ५० लाख पाउण्ड सहयोग गर्ने घोषणा गरेको छ । युरोपेली सङ्घअन्तर्गतको नागरिक सुरक्षा तथा मानवीय सहायता परिचालनमार्फत २० लाख युरो सहयोगको घोषणा गरिएको छ ।
त्यस्तै, स्विट्जरल्याण्डले १० लाख अमेरिकी डलर, डेनमार्कले ३५ लाख डेनिस क्रोनर, जर्मनीले २० लाख अमेरिकी डलर, आयरल्याण्डले ५ लाख युरो, चेक गणतन्त्रले २५ लाख चेक क्रोनर र नर्वेले १ करोड २७ लाख नर्वेजियन क्रोनर सहयोग गर्ने घोषणा गरेका छन् ।
फ्रान्सले बाढी प्रभावित क्षेत्रका २०० घरपरिवारका लागि आपत्कालीन राहत सामग्री उपलब्ध गराएको छ । लक्जेम्बर्ग र लातभियाले पनि प्रभावितका लागि राहत सामग्री उपलब्ध गराएका छन् । विभिन्न देशबाट प्राप्त भइरहेको सहयोगमा खाद्यान्न तथा अन्य अत्यावश्यक राहत सामग्रीसँगै उद्धार उपकरण र प्राविधिक सहयोगसमेत समावेश छन् । यसले बाढी प्रभावित क्षेत्रमा जारी खोज, उद्धार तथा राहत कार्यलाई थप सहयोग पुगेको जनाइएको छ ।
रसुवाको भोटेकोसी बाढीबाट ठूलो मानवीय तथा भौतिक क्षति भएपछि नेपाल सरकारले प्रभावित क्षेत्रमा उद्धार, राहत तथा पुनःस्थापनाका लागि अन्तर्राष्ट्रिय सहयोग समन्वय गरिरहेको छ ।
