- ११ बैशाख २०८३, शुक्रबार / Apr 24, 2026
रौतहट प्रहरीले विभिन्न आपराधिक घटनामा संलग्न ११ जना प्रतिवादीलाई पक्राउ।
पक्राउ परेकामध्ये दुई जना गत भदौ २४ गते गौर कारागारबाट भागेका फरार कैदी।
कर्तव्य ज्यान र जबरजस्ती करणी मुद्दाका फरार कैदीहरू पुनः कारागारमा बुझाइए।
अन्य पक्राउ पर्नेहरू चेक बाउन्स, कुटपिट, आगजनी र लुटपाटजस्ता घटनामा संलग्न।
पक्राउ परेकामाथि अदालतका फैसलाअनुसार कानुनी प्रक्रिया अघि बढाइँदै।
रौतहट, २१ कार्तिक । रौतहट प्रहरीले विभिन्न आपराधिक घटनामा संलग्न ११ जना प्रतिवादीलाई पक्राउ गरेको छ। पक्राउ परेकामध्ये दुई जना गत भदौ २४ गते जेनजी आन्दोलनको क्रममा गौर कारागारबाट भागेका थिए।
जिल्ला प्रहरी कार्यालय रौतहटका प्रमुख एसपी रबिन कार्कीका अनुसार, कर्तव्य ज्यान मुद्दाका कैदी चन्द्रपुर–१ बस्ने ४७ वर्षीय नागेन्द्र माझीलाई गाउँघरमा लुकीछिपी बसिरहेको अवस्थामा १९ गते पक्राउ गरी पुनः कारागार कार्यालय गौरमा बुझाइएको हो।
त्यस्तै, सोही आन्दोलनकै क्रममा फरार जबरजस्ती करणी मुद्दाका थुनुवा देवाही गोनाही–६ का सुधीरकुमार राम स्वेच्छाले १९ गते कारागार कार्यालय गौरमा उपस्थित भएका छन्। त्यसका अलावा, चेक बाउन्स मुद्दामा फरार रहेका अभयकुमार प्रसाद साह, किशोरी प्रसाद यादव, र अदालतको पुरानो फैसला कार्यान्वयन हुन बाँकी रहेका दिनेश कुमार चौधरी कलवार समेत पक्राउ परेका छन्।
कुटपिट, आक्रमण, आगजनी र लुटपाटजस्ता घटनामा संलग्न अन्य अभियुक्तहरू पनि क्रमशः पक्राउ परेका छन् । राजकिशोर यादव, युगल किशोर यादव, रामअज्ञा मुखिया, नईमुद्दिन दर्जी, मनिष कुमार साह, र जादोलाल साह।
जिल्ला प्रहरी कार्यालय रौतहटका सहप्रवक्ता इन्स्पेक्टर रुद्र कँडेलका अनुसार, पक्राउ परेकामाथि आवश्यक कानुनी प्रक्रिया अघि बढाइएको छ र थप अनुसन्धान जारी छ।
