- २८ श्रावण २०८३, बिहीबार / Aug 13, 2026
मुख्य बुँदा
जोगवनी नाकामा नेपाल प्रवेश गर्नेहरूका लागि परिचयपत्र अनिवार्य गरिएको छ ।
मोरङ जिल्ला सुरक्षा समितिको निर्णयपछि सीमा निगरानी कडा बनाइएको छ ।
अवैध घुसपैठ र आपराधिक गतिविधि रोक्न चेकिङ कडाइ गरिएको हो ।
रोहिंगिया घुसपैठ हुन सक्ने आशङ्कामा विशेष सतर्कता अपनाइएको दाबी ।
कलकत्ता–जोगवनी रेलमार्गलाई मुख्य जोखिम क्षेत्र मानिएको छ ।
रेल आउने समयमा विशेष सुरक्षा जाँच र निगरानी व्यवस्था लागू गरिएको छ ।
तालिमप्राप्त कुकुरसहित सुरक्षा टोली परिचालन गरिएको छ ।
फरार कैदीहरूको आवतजावत रोक्न पनि निगरानी बढाइएको छ ।
विराटनगर, २७ बैशाख । मोरङको सीमावर्ती क्षेत्र जोगवनी नाकामा सुरक्षा निगरानी कडा पारिएको छ । नेपाल प्रवेश गर्ने सबैका लागि परिचयपत्र अनिवार्य गरिएको छ । मोरङ जिल्ला सुरक्षा समितिको बैठकले अवैध घुसपैठ र आपराधिक गतिविधि रोक्न यस्तो निर्णय गरेको हो ।
मोरङका सहायक प्रमुख जिल्ला अधिकारी सरोज कोइरालाका अनुसार यो निर्णय नेपाल–भारतबीचको कुनै औपचारिक सहमति नभई पूर्ण रूपमा आन्तरिक सुरक्षा सतर्कता हो । उनले सीमामा अवैध घुसपैठको सम्भावना देखिएकाले चेकजाँच कडा बनाइएको बताए ।
सुरक्षा स्रोतका अनुसार भारतको पश्चिम बंगालमा राजनीतिक परिवर्तनपछि रोहिंगिया मुस्लिमहरू विस्थापित भएर नेपाल छिर्न सक्ने आशङ्का गरिएको छ । भारतीय सञ्चारमाध्यममा समेत यसबारे विभिन्न दाबी र भिडियोहरू सार्वजनिक भइरहेका छन्, यद्यपि यसको आधिकारिक पुष्टि नभएको स्रोतको भनाइ छ ।
प्रशासनले विशेषगरी कलकत्ता–जोगवनी रेलमार्गबाट ठूलो संख्यामा मानिस प्रवेश गर्न सक्ने सम्भावनालाई ध्यानमा राख्दै निगरानी बढाएको छ । रेल आउने समयमा परिचयपत्र जाँच कडा बनाइएको र आवश्यक परे विशेष सुरक्षा उपाय अपनाइने बताइएको छ ।
यसका साथै सीमामा अवैध घुसपैठ रोक्न तालिमप्राप्त कुकुरसहितको सुरक्षा टोली पनि परिचालन गरिएको छ । फरार कैदीहरूको आवतजावत रोक्नु पनि निगरानी बढाउनुको अर्को कारण रहेको प्रशासनले जनाएको छ ।
