- २२ भाद्र २०८३, सोमबार / Sep 7, 2026
एजेन्सी | कैलाश खबर, १८ जेठ । रुसबाट तेल, ग्यास वा पेट्रोकेमिकल उत्पादनहरू किन्ने देशहरूलाई ५०० प्रतिशतसम्म ट्यारिफ (कर) लगाउने चेतावनी अमेरिकाले दिएको छ । यसमा विशेषतः भारत र चीन जस्ता मुलुकहरूलाई लक्षित गरिएको हो ।
अमेरिकी सिनेटर रिचर्ड ब्लुमेन्थलले युक्रेनको राजधानी कीभमा पत्रकारहरूसँग कुरा गर्दै, भारत र चीनले रुसबाट सस्तो तेल खरिद गरेर अप्रत्यक्ष रूपमा युक्रेनमाथि भएको युद्धलाई सहयोग गरिरहेको बताएका छन् । उनका अनुसार यी दुई देशले रुसको ७० प्रतिशत तेल किनिरहेका छन् ।
यदि रुसले युक्रेनसँग शान्ति वार्ता नगरे, उसमाथि प्रत्यक्ष ५००% ट्यारिफ लगाइनेछ ।
यस्तै, रुसबाट तेल, ग्यास, युरेनियम वा पेट्रोकेमिकल खरिद गर्ने देशहरूलाई पनि त्यस्तै दरमा ट्यारिफ लगाउने प्रस्ताव अमेरिकी सिनेटमा ल्याउने तयारी भइरहेको छ ।
रुसले हालै भारत, चीन र रूस मिलेर आरआईसी त्रिकोणीय सहकार्य पुनःसक्रिय गर्ने प्रस्ताव अघि सारेको छ । यस्तो संवेदनशील समयमा अमेरिकी सिनेटरहरूको यो धारणा सार्वजनिक हुनु, रुसी मित्र राष्ट्रहरूलाई चेतावनी दिने संकेतका रूपमा हेरिएको छ । यदि अमेरिका यस्तो उच्च ट्यारिफ लागू गर्छ भने, भारत र चीनमा इन्धनको मूल्यवृद्धि, आपूर्ति संकट, तथा अन्तर्राष्ट्रिय व्यापार सम्बन्धमा तनाव आउनसक्ने विश्लेषकहरू बताउँछन् ।
अमेरिकाले रुसमाथि आर्थिक र कूटनीतिक दबाब बढाउने क्रम जारी राखेको छ । आगामी हप्तामा अमेरिकी सिनेटमा यो प्रस्तावमा थप छलफल हुने सम्भावना छ । यस्तो अवस्थामा भारत र चीनको रणनीति कस्तो हुन्छ भन्ने कुराले अन्तर्राष्ट्रिय राजनीतिमा गहिरो प्रभाव पार्ने देखिन्छ ।
