युक्रेन युद्धको विरोध गर्ने रुसी विपक्षी नेता श्लोसबर्गलाई ११ वर्ष जेल

रुसको राजधानी मस्कोमा रहेको अदालतले श्लोसबर्गलाई दोषी ठहर गर्दै उक्त सजाय सुनाएको हो। आगामी महिना हुने संसदीय चुनावअघि विपक्षी नेताविरुद्ध कारबाही तीव्र भइरहेका बेला अदालतको फैसला आएको हो।

युक्रेनमाथि रुसले सन् २०२२ को फेब्रुअरीमा आक्रमण सुरु गरेयता श्लोसबर्गले सार्वजनिक रूपमा युद्धको विरोध गर्दै आएका छन्। उनी याब्लोको पार्टीका वरिष्ठ नेता हुन्। श्लोसबर्गविरुद्ध पछिल्लो दुई वर्षमा दायर गरिएको यो दोस्रो मुद्दा भएको बताइएको छ।

अदालतले उनलाई ११ वर्ष एक महिनाको जेल सजाय सुनाउनुका साथै उनको पार्टीलाई चुनावमा सहभागी हुनसमेत प्रतिबन्ध लगाएको छ। रुसको सर्वोच्च अदालतले यसअघि गरेको फैसला कायम राख्दै पछिल्लो निर्णय सुनाएको जनाइएको छ।

रुसमा आगामी सेप्टेम्बर १८ देखि २० सम्म संसदीय चुनाव हुँदैछ। चुनावअघि विपक्षी नेता तथा युद्धको आलोचना गर्ने व्यक्तिहरूमाथि भइरहेको कारबाहीलाई लिएर अन्तर्राष्ट्रिय स्तरमा समेत चासो बढेको छ।