- २४ भाद्र २०८३, बुधबार / Sep 9, 2026
दुधपाटी । काठमाडौं, भक्तपुर र ललितपुर उपत्यकालगायत नेवार समुदायकाे बसोवास भएको ठाउँमा सकी मन पुन्ही मनाईएकाे छ ।
परम्परागत जीवनशैलीमा भक्तपुरका नेवार समुदायले पनि भव्यताकासाथ मनाएका छन् । आफ्नै महत्व रहेको याे पर्व सकी भनेको अरम पालकको जरा र पुन्ही भनेको पूर्णिमा हो ।
नेवा संस्कृतिबाट आएको शब्द सकी मन पुन्हीलाई स्थानीयले सकिमिला पुन्ही भनेर मनाउँछन् । हरेक वर्ष कार्तिक शुक्ल पूर्णिमाको दिन यो पुन्ही मनाइन्छ ।
नेपाल संवतको पहिलो महिनामा मनाउने भावले यसलाई कचलथवा पुन्ही पनि भन्ने गरेको सँस्कृतिविद् ओम धौवडेल बताए ।
उनले भने, “सकिमिला पुन्ही कहिलेकाहीँ कार्तिक भन्दा पहिले वा ढिलो पनि पर्न सक्छ । यस दिन टोल टोलमा मन्दिर परिसर अगाडि भुटेको अन्नले देवताको मूर्ति, मन्दिर, मुसाको आकार बनाएर धार्मिक भजन गाएर मनाउने गरिन्छ ।”
नेवार समुदायले फसल काट्ने मौसमको सफल समापन भएको रूपमा देवी देवतालाई धन्यवाद दिदै पुजा गरेर मनाउछन् ।
पुन्हीको अवसरमा भक्तपुरको टौमढी, नासमना, दरवारस्क्वायर, इटाछें, व्यासी, दुधपाटी, झौखेल कमलविनायकलगायतका क्षत्रमा सकिमिला पुन्ही धुमधामकासाथ मनाएका हुन् ।
