- ३१ आश्विन २०८३, शनिबार / Oct 17, 2026
काठमाडौं, ३ जेठ । विशेष अदालतले नेपाल नागरिक उड्डयन प्राधिकरण (क्यान)का पूर्वमहानिर्देशक सञ्जीव गौतमलाई पुर्पक्षका लागि थुनामा पठाउन आदेश दिएको छ।
विशेष अदालतका सदस्यहरू नारायणप्रसाद पौडेल, हेमन्त रावल र डिल्लीराज श्रेष्ठको इजलासले उक्त आदेश जारी गरेको हो। पोखरा क्षेत्रीय अन्तर्राष्ट्रिय विमानस्थल आयोजनासँग सम्बन्धित कथित अनियमितता र हिनामिना प्रकरणमा अनुसन्धान तथा मुद्दा प्रक्रियालाई ध्यानमा राख्दै गौतमलाई थुनामा राखेर पुर्पक्ष चलाउने निर्णय गरिएको अदालतले जनाएको छ।
यसअघि अख्तियार दुरुपयोग अनुसन्धान आयोगले तत्कालीन महानिर्देशक प्रदीप अधिकारीसहित सञ्जीव गौतमविरुद्ध भ्रष्टाचार अभियोगमा विशेष अदालतमा मुद्दा दायर गरेको थियो।
आयोगले गौतमबाट ६ करोड ७३ लाख ९९ हजार रुपैयाँ असुलउपर गरिनुपर्ने र सोअनुसार कैद सजायसमेत मागदाबी गरेको छ। उक्त मुद्दाको अन्तिम फैसला भने अझै हुन बाँकी रहेको छ।
