- ११ कार्तिक २०८३, बुधबार / Oct 28, 2026
सर्लाही, २ जेठ । सर्लाहीको हरिपुर नगरपालिका–५ मजुर्वास्थित कृष्ण इँट्टा उद्योगमा इँट्टा निकाल्ने क्रममा इँट्टाको चाङले थिच्दा तीन जनाको ज्यान गएको छ भने दुई जना घाइते भएका छन्।
जिल्ला प्रहरी कार्यालय सर्लाहीका अनुसार हिजो बेलुका भएको दुर्घटनामा गोडैता नगरपालिका–७ रामवनका ५० वर्षीय फिताइ मन्सुर, गोडैता नगरपालिका–९ का ३५ वर्षीय शम्भु राउत तथा भारतको लखिमपुरका ३५ वर्षीय अङ्गद कुमारको मृत्यु भएको हो।
प्रहरी नायब उपरीक्षक एवं जिल्ला प्रहरी कार्यालय सर्लाहीका प्रवक्ता सरोज राईका अनुसार इँट्टा निकाल्ने क्रममा अचानक इँट्टाको चाङ भत्किँदा उनीहरू पुरिएका थिए। घटनापछि स्थानीयवासी र प्रहरीले उद्धार गरेका थिए।
दुर्घटनामा घाइते भएका मलङ्गवा नगरपालिका–७ का ३२ वर्षीय तुलसी महतोको प्रादेशिक अस्पताल मलङ्गवामा उपचार भइरहेको छ भने ५२ वर्षीय सत्यनारायण महतोको स्थानीय स्वास्थ्य संस्थामा उपचार भइरहेको प्रहरीले जनाएको छ। दुवै जनाको अवस्था सामान्य रहेको बताइएको छ। प्रहरीले घटनाबारे थप अनुसन्धान भइरहेको जनाएको छ।
