एसईईको पूरक परीक्षा तालिका सार्वजनिक, साउन २९ देखि सुरु हुने

काठमाडौँ, १३ असार । राष्ट्रिय परीक्षा बोर्डले माध्यमिक शिक्षा परीक्षा (एसईई) २०८१ का लागि पूरक (ग्रेड सुधार) परीक्षाको तालिका सार्वजनिक गरेको छ। बोर्डले जानकारी गराएअनुसार हालै सार्वजनिक नतिजामा ग्रेड प्राप्त गर्न नसकेका वा अनुपस्थित भएका परीक्षार्थीलाई पूरक परीक्षा दिने अवसर प्रदान गरिएको हो।

परीक्षा साउन २९ गतेदेखि सुरु भई भदौ ६ गतेसम्म बिहान ८ बजेदेखि ११ बजेसम्म सञ्चालन हुनेछ। यस वर्षको एसईई परीक्षामा कुल पाँच लाख १४ हजार ७१ जना विद्यार्थी सहभागी भएका थिए। बोर्डका अनुसार ६१.८१ प्रतिशत परीक्षार्थी मात्र ग्रेडेड (उत्तीर्ण) भएका छन्।

एसईई पूरक परीक्षा सम्बन्धी विस्तृत विवरण र विषयगत तालिका बोर्डको वेबसाइटमा हेर्न सकिनेछ। बोर्डले पूरक परीक्षा समयमै सम्पन्न गर्न सम्बन्धित विद्यालय, शिक्षा विकास निर्देशनालय तथा परीक्षा केन्द्रहरूलाई आवश्यक तयारी गर्न अनुरोध गरेको छ।