- २७ असार २०८३, शनिबार / Jul 11, 2026
काठमाडौं । सुन्तला उत्पादनका लागि प्रख्यात मानिएका दैलेख, सल्यान, तथा पर्वतका ठाउँहरुमा व्यापारि बगैचामै पुगेर सुन्तला उठाउन थालेपछि किसान खुसी भएका छन् भने मूल्य नपाउँदा दुखि । पर्वत देउपुरका कृषकलाई आजभोलि सुन्तला बिक्री गर्न भ्याइनभ्याइ छ । काठमाडौँ, पोखरा, नारायणगढदेखि बुटवलसम्मका व्यापारीहरू बगानमै सुन्तला किन्नका लागि धाउने गरेका छन् ।
मोदी गाउँपालिका–२ देउपुरमा चार वर्षअघिसम्म सहकारीमार्फत बिक्री गर्दै आए पनि पछिल्ला वर्षहरूमा भने कृषकले आफ्नै ढङ्गले व्यापारीसँग कारोबार गर्ने गरेका छन् । पहिले माछापुच्छे« सुन्तला सहकारी संस्थामार्फत बिक्री गरे पनि अहिले निजी हिसाबले नै बिक्री गर्न थालेको अगुवा कृषक दाताराम चापागाईंले बताए । सुन्तला टिप्नका लागि व्यापारीका प्रतिनिधिको चहलपहल बढ्दो छ ।
स्थानीय शिक्षक भूमिराज शर्मा सुन्तला टिप्ने र लैजानेका कारण यहाँ मेला लागे जस्तै हुने गरेको र थोक व्यापारीले बगैँचाबाट नै खरिद गरेपछि कृषकलाई पनि सहज भएको बताउँछन् । सुन्तला बिक्रीबाटै राम्रो आम्दानी गरेका छन् । यहाँका अधिकांश किसानले व्यापारीलाई बगैँचा नै जिम्मा लगाउने गरेका छन् । दैनिकजसो ट्रकहरू आएर सुन्तला टिपेर लैजाने गरेको स्थानीय प्रकाश चापागाईंले बताए ।
यहाँका सबै किसानको कारोबारको कुरा गर्दा गतवर्ष करिब पाँच करोडका सुन्तला बिक्री भएका थिए । यसपटक पनि सोही हाराहारीमा कारोबार हुने अपेक्षा गरेका छन् । व्यवसायीले बगैँचामै ‘ग्रेडिङ’ गरेर सुन्तला लैजान थालेको र मूल्य भने कम दिने गरेको कृषक दाताराम चापागाईंले बताए । तर दुई दशकदेखि गरिएको व्यावसायिक सुन्तला खेतीबाट यहाँका कृषकले मनग्य आम्दानी गर्दै आएका छन् ।
