- २९ भाद्र २०८३, सोमबार / Sep 14, 2026
सुर्खेत, १९ फागुन । सुर्खेतको छिन्चु क्षेत्रमा प्रेसर कुकरमा ‘खतरा’ लेखिएको शंकास्पद वस्तु फेला परेको छ ।
भेरीगंगा नगरपालिका–१० राताचौरस्थित छिन्चु–जाजरकोट सडकखण्डको सडक किनारमा रातो प्लाष्टिकले बेरिएको अवस्थामा उक्त वस्तु भेटिएको हो । मंगलबार बिहान स्थानीयले सडक छेउमा राखिएको प्रेसर कुकरमा ‘खतरा’ लेखिएको देखेपछि तत्काल प्रहरीलाई जानकारी गराएका थिए । सूचना प्राप्त हुनासाथ जिल्ला प्रहरी कार्यालय सुर्खेतबाट प्रहरी टोली घटनास्थल पुगेको प्रहरी निरीक्षक प्रकाश के . सी . ले जानकारी दिए । उनका अनुसार सम्भावित जोखिमलाई मध्यनजर गर्दै तत्काल सुरक्षा घेरा बनाएर सर्वसाधारणको आवतजावतमा रोक लगाइएको छ ।
प्रहरीले क्षेत्रलाई पूर्ण रूपमा नियन्त्रणमा लिँदै आवश्यक सतर्कता अपनाएको जनाएको छ । शंकास्पद वस्तुको प्रकृति पहिचान गर्न नेपाली सेनासँग समन्वय गरिएको छ । सेनाको बम डिस्पोजल टोली घटनास्थलमा पुगेर आवश्यक जाँच तथा निष्क्रिय पार्ने प्रक्रिया अघि बढाउने तयारी भइरहेको प्रहरीले जनाएको छ ।
घटनाबारे थप विवरण आउन बाँकी रहेको प्रहरीले जनाएको छ ।
