प्रतिनिधिसभा निर्वाचनलाई लक्षित गर्दै हुम्लाको हिल्सा नाका बन्द

हुम्ला, १९ फागुन । प्रतिनिधिसभा निर्वाचनलाई लक्षित गर्दै हुम्लाको हिल्सा नाका बन्द गरिएको छ ।

फागुन २१ गते हुने प्रतिनिधिसभा निर्वाचनको सुरक्षालाई ध्यानमा राख्दै उत्तरी नाम्खा गाउँपालिका–५ स्थित चीनसँग सीमा जोडिएको हिल्सा नाकाबाट हुने आवतजावत सोमबारदेखि बन्द गरिएको हो । जिल्ला प्रहरी कार्यालय हुम्लाका अनुसार निर्वाचन अवधिभर सुरक्षा व्यवस्थालाई कडा पारिएको छ ।

जिल्ला प्रहरी कार्यालय हुम्लाका डिएसपी शंकर खडकाले निर्वाचनको मत परिणाम सार्वजनिक नभएसम्म नाका बन्द रहने जानकारी दिए । निर्वाचनलाई शान्तिपूर्ण, निष्पक्ष र सुरक्षित रूपमा सम्पन्न गराउने उद्देश्यले सीमा क्षेत्रमा विशेष निगरानीसमेत बढाइएको प्रहरीले जनाएको छ ।