- ३० श्रावण २०८३, शनिबार / Aug 15, 2026
काठमाडौं, २३ जेठ । पतञ्जली जग्गा हिनामिना प्रकरणमा पूर्वप्रधानमन्त्री माधव नेपालसँगै मुद्दा परेका भक्तपुरको सूर्यविनायक नगरपालिकाका मेयर वासुदेव थापाको पद निलम्बन नहुने भएको छ। बिहीबार अख्तियारले नेकपा (एकीकृत समाजवादी) का अध्यक्ष समेत रहेका नेपालसहित ९३ जनाविरुद्ध विशेष अदालतमा मुद्दा दर्ता गरेको थियो।
सार्वजनिक पदमा रहेका व्यक्तिमाथि अदालतमा भ्रष्टाचार मुद्दा दायर भएपछिको कानूनी प्रावधानअनुसार पद निलम्बनमा पर्ने व्यवस्था छ। यसैअनुसार माधव नेपालको सांसद पद स्वतः निलम्बनमा परिसकेको छ। तर, मेयर वासुदेव थापालाई भने जग्गा जफतको प्रयोजनका लागि मात्र प्रतिवादी बनाइएको अख्तियारले स्पष्ट पारेको छ।
थापाले साविक साँगा गाविस ४ (ख) को कित्ता नम्बर ५५२ को जग्गा डिल्लीध्वज बराइलीसँग १ करोड ३० लाख ६६ हजारमा खरिद गरेको बयान दिएका थिए। उनले त्यो जग्गा पतञ्जलीसँग सम्बन्धित भएको आफूलाई जानकारी नभएको र कानुनी प्रक्रिया पूरा गरी खरिद गरेको बताएका छन्।
यस प्रकरणमा प्रमुख थापासहित २८ जना व्यक्ति र २ कम्पनीलाई जग्गा जफत प्रयोजनका लागि प्रतिवादी बनाइएको छ। बाँकी ६३ जनालाई भने बिगो, कैद, र जरिवाना मागदाबी सहितका प्रतिवादी बनाइएको अख्तियारले जनाएको छ ।
