ड्रुज समुदायका व्यक्तिहरुमाथि सोधपुछबिनै गोली चलाएको आरोप

मुख्य बुँदा 

सिरियाको दक्षिणी भागमा ड्रुज र बेदुइन जातिबीचको हिंसा उत्कर्षमा

राष्ट्रपति कार्यालयद्वारा शान्ति कायम गर्न सेना परिचालन गर्ने निर्णय

हिंसामा हालसम्म करिब ६ सयको मृत्यु, सर्वसाधारणसमेत मारिए

संयुक्त राष्ट्रसंघका मानवअधिकार प्रमुखको छिटो र पारदर्शी छानबिनको माग

इजरायलले स्वेइदा र दमास्कसमा गरेको हवाई आक्रमणले परिस्थिति थप जटिल

सिरियाली सरकारमाथि बेदुइनको पक्षपात र ड्रुज समुदायमाथि दमनको आरोप

एजेन्सी, ३ असार । सिरियामा सेना परिचालन गरिने भएको छ। सिरियाको राष्ट्रपति कार्यालयले दक्षिणी सीरियामा सेना परिचालन गर्ने निर्णय गरेको हो ।

ड्रुज र बेदुइन जातिबीचको लडाइँ उत्कर्षमा पुगेपछि हिंसा रोक्न सेना परिचालन गर्ने निर्णय भएको हो । संयुक्त राष्ट्रसंघका मानवअधिकार प्रमुख भोल्कर टुर्कले सीरियाको दक्षिणी शहर स्वेइदामा पछिल्ला दिनमा भएको हिंसात्मक झडपपछि गम्भीर चिन्ता व्यक्त गर्दै छिटो र पारदर्शी छानबिनको माग गरेका छन् ।

सिरियामा भएको झडपमा हालसम्म करिब ६ सय मानिसको ज्यान गएको अन्तर्राष्ट्रिय सञ्चारमाध्यमले जनाएको छ। बेलायतमा कार्यालय रहेको सीरियन अब्जरभेटरी फर ह्युमन राइट्सले हिंसामा लडाकुदेखि आम सर्वसाधारण नागरिक मारिएको बताएको छ। यो हिंसा जारी रहँदा इजरायलले बुधबार सुवैदा र सिरियाको राजधानी दमास्कसमा हवाई आक्रमण गरेको थियो।

सिरियामा गत आइतबार शुुरु भएको जातीय हिंसामा ६०० मानिसको मृत्यु भइसकेको छ। हिंसामा सरकारले बेदुइन जातिको पक्ष लिएको र ड्रुज समुदायका व्यक्तिहरुमाथि सोधपुछबिनै गोली चलाएको आरोप छ।