तराईसहित विभिन्न ठाउँमा हावाहुरी र वर्षाको सम्भावना

काठमाडौं, ३ जेठ । जल तथा मौसम विज्ञान विभागको मौसम पूर्वानुमान महाशाखाका अनुसार हाल देशभर मौसम खराब रहेको छ। हावाहुरी, चट्याङ र वर्षाका कारण मौसम प्रतिकूल बनेको छ। आज पनि यस्तै मौसम रहने अनुमान गरिएको छ।

कोशी, मधेश, बागमती, गण्डकी र लुम्बिनी प्रदेशका पहाडी भू–भागमा आंशिकदेखि सामान्य बदली रहनेछ भने बाँकी क्षेत्रमा मुख्य रूपमा सफा देखि आंशिक बदलीको अवस्था रहनेछ। यी प्रदेशका पहाडी भू–भागका थोरै स्थानमा र तराईका एक–दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ।

यस्तै, उच्च पहाडी तथा हिमाली क्षेत्रका एक–दुई स्थानमा हल्का वर्षा वा हिमपात हुन सक्ने महाशाखाले जनाएको छ। मधेश, कोशी, बागमती, गण्डकी र लुम्बिनी प्रदेशको तराई क्षेत्रमा हावाहुरीको सम्भावना रहेकोले सतर्कता अपनाउन विभागले आग्रह गरेको छ।

मौसम खराब रहने भएकाले सम्भावित जोखिमबाट बच्न सावधानी अपनाउन मौसम विभागले सर्वसाधारणलाई अनुरोध गरेको छ।