चीनबाट ल्याइएको रासायनिक मल किन थन्क्याइयो भन्सारकै गोदाममा ?

सिन्धुपाल्चोक । चीनबाट ल्याइएको रासायनिक मल तातोपानी भन्सार कार्यालयको गोदाममा थन्किएको छ । एक सय ११ कन्टेनरले वैशाख महिनाभर ल्याएको सात लाख ३५ हजार बोरा रासायनिक मल १० महिनादेखि लार्चा सुक्खा बन्दरगाह यार्डभित्र गोदाममा थन्किएको हो । कृषि सामग्री कम्पनी र आयातकर्ताबीच सहमति भए पनि मल गोदामबाट उठ्न नसक्दा अरू सामान लोड–अनलोड गर्न कठिनाइ भएको तातोपानी भन्सार कार्यालय प्रमुख दयानन्द केसी बताए ।

खासा भएर तातोपानी सुक्खा बन्दरगाह आएका अन्य सामग्री भन्सार कार्यालयभित्र राखेर चेकजाँच गर्नुपर्ने अवस्था छ । रासायनिक मलको राजस्व असुल नहुने भएकाले कृषि सामग्री कम्पनी लिमिटेडले चिनियाँ सहरबाट झिकाएर सिधै राजधानी लाने गरेको उनले बताए । कोरोनापछि खुलेको तातोपानी नाकामा पाँच वर्षदेखि एकछत्र काम गर्दै आएको सिल्क कम्पनी अन्तर्गत सिल्क मार्केट प्रालिले चीनबाट मल आयात गरेको हो ।

प्रालिले नेपाल सरकारको कृषि सामग्री कम्पनी लिमिटेडबाट रासायनिक मल आयात गर्ने ठेक्का पाएको छ । ठेक्का आर्थिक वर्ष ०७९, ८० मा सम्झौता भएको हो । सम्झौताअनुसार सिल्क मार्केटले रासायनिक मल समयमै ल्याउन सकेको छैन ।