- २८ बैशाख २०८३, सोमबार / May 11, 2026
टेक्सास, २३ असार । संयुक्त राज्य अमेरिकाको मध्य टेक्सासमा शुक्रबार आएको भीषण बाढीका कारण हालसम्म ७८ जनाको मृत्यु पुष्टि भएको छ भने ४१ जना अझै बेपत्ता रहेका छन्।
यो पछिल्लो दशकको टेक्सासमा घटेको सबैभन्दा गम्भीर प्राकृतिक विपत्ति मानिएको छ। मृत्यु हुनेमध्ये सबैभन्दा बढी प्रभावित केअर काउन्टीमा मात्र ६८ जनाको ज्यान गएको छ, जसमा २८ जना बालबालिका रहेका छन्।
विशेष गरी ग्वाडालुपे नदी किनारमा रहेको ‘क्याम्प मिस्टिक’ नामक क्रिश्चियन बालिका शिविर डुबानमा परेपछि धेरै बालबालिकाको ज्यान गएको हो। क्याम्प मिस्टिकका १० बालिका र एक सल्लाहकार अझै बेपत्ता छन्।
अधिकारीहरूले अझै धेरै शवहरू फेला पर्न सक्ने सम्भावना बताउँदै मृत्यु संख्या अझै बढ्न सक्ने चेतावनी दिएका छन्। शुक्रबार बिहान सबेरै बाढीको समय, अधिकांश शिविरार्थीहरू सुतिरहेका थिए। त्यस समयमा नदीको जलस्तर ४५ मिनेटभित्र ८ मिटरले बढेको थियो। यस्तो आकस्मिक र तीव्र बाढीले मान्छेलाई भाग्ने समयसमेत दिएन।
उद्धार टोलीहरूले हिलो र भग्नावशेषबीच मानिसहरू खोजिरहेका छन्, तर मौसममा अझै वर्षाको सम्भावना भएकाले उद्धार कार्य थप जटिल बन्दै गएको छ। टोलीहरूलाई विषालु सर्पहरू, जलमग्न संरचना र अवरोधहरूले समेत काम गर्न कठिन बनाइरहेका छन्।
बाढीपछि टेक्सासको इतिहासमै सबैभन्दा ठूलो खोज तथा उद्धार अभियान अहिले शव संकलन कार्यमा परिणत भएको बताइएको छ। हालसम्म फेला परेका १८ वयस्क र १० बालबालिकाको औपचारिक रूपमा पहिचान हुन बाँकी छ।
टेक्सासका गभर्नर ग्रेग एबोटले आइतबार पत्रकार सम्मेलनमा भने, “हराइरहेका हरेक व्यक्तिलाई फेला पार्न कुनै कसर बाँकी राखिने छैन।” उनले स्थानीय प्रशासन, फेडरल एजेन्सी र स्वयंसेवी संस्थाहरू समन्वयमा काम गरिरहेको जानकारी दिएका छन्।
