- २५ भाद्र २०८३, बिहीबार / Sep 10, 2026
भक्तपुर । मध्यपुर ठिमी नगरपालिका वडा नं १ लोकन्थलीमा डलर देखाई रु ३ लाख ५० हजार ठगी गरी भाग्ने दुई जनालाई प्रहरीले पक्राउ गरेको छ । पीडित ओखलढुंगा सिद्धिचरण नगरपालिका वडा नं ६ घर भई हाल काठमाडौं बुढानिलकण्ठ नगरपालिका वडा नं ११ बस्ने बर्ष ३२ की हिरुमाया मगरले वैशाख ३ गते प्रहरी वृत्त ठिमीमा दिएको जाहेरी आधारमा उनीहरुलाई पक्राउ गरिएको हो ।
डलर साट्ने बाहानामा सुमन शेर्पा र लाक्पा शेर्पाले लोकन्थलीमा बोलाई डलर देखाई तीन लाख पचास हजार ठगी भागेको खुलेको छ । जिल्ला प्रहरी परिसर भक्तपुर र काठमाण्डौ उपत्यका अपराध अनुसन्धान कार्यालय भक्तपुरबाट खटिएको प्रहरी टोलीले बागमती प्रदेश ०२–०४८ प ४५२५ नं. को थान – १ मोटरसाइकल सहित उक्त घटनामा संलग्नलाई विहीबार पक्राउ गरेको भक्तपुर प्रहरीले जनाएको छ ।
सूर्यविनायक नगरपालिका वडा नं २ बङ्गलामुखी मन्दिरबाट नियन्त्रणमा लिई प्रहरी वृत्त ठिमी भक्तपुर मार्फत थप अनुसन्धान कार्य भईरहेको प्रहरीले जनाएको छ । पक्राउ पर्नेमा सिन्धुपाल्चोक बाह्रविसे नगरपालिका वडा नं २ घर भई हाल भक्तपुर सूर्यविनायक नगरपालिका वडा नं २ बस्ने वर्ष २९ को सरोज तामाङ र सिन्धुपाल्चोक बाह्रविसे नगरपालिका वडा नं २ घर भई हाल सूर्यविनायक नगरपालिका वडा नं २ बस्ने वर्ष ३६ को राज कुमार तामाङ रहेका छन् ।
