- २६ असार २०८३, शुक्रबार / Jul 10, 2026
वासिङ्टन । अमेरिकी राष्ट्रपति डोनाल्ड ट्रम्पले वामपन्थी विचारधारा बोकेको एन्टिफा समूहलाई आतंकवादी संगठन घोषणा गर्नुभएको छ। राष्ट्रपति ट्रम्पले आफ्नै सामाजिक सञ्जाल ट्रुथ सोशल मार्फत जानकारी दिँदै सो समूहलाई आतंकवादी संगठनका रूपमा सूचीकृत गर्ने निर्णय भएको बताउनुभएको हो।
एन्टिफा समूह लामो समयदेखि अमेरिकामा नव–नाजीवाद, नव–फासिवाद, गोरावादी सर्वोच्चतावाद र जातीय विभेदविरुद्ध सक्रिय रहँदै आएको छ। यद्यपि, यसको गतिविधि हिंसात्मक हुने गरेको भन्दै आलोचना हुँदै आएको छ।
राष्ट्रपति ट्रम्पले एन्टिफा समूहलाई आर्थिक सहयोग गर्नेहरूमाथि समेत कडा कानुनी कारबाही गर्ने चेतावनी दिनुभएको छ। बीबीसी का अनुसार, सो समूहलाई सहयोग गर्नेहरू उच्च कानुनी मापदण्डअनुसार छानबिनमा पर्नेछन्।
इतिहासअनुसार एन्टिफाको उत्पत्ति सन् १९२०–१९३० को दशकमा युरोपेली फासिवादी शक्तिहरूविरुद्ध चलेको आन्दोलनबाट भएको मानिन्छ। हाल यसका सदस्यहरूले प्रायः कालो कपडा लगाउने, अनुहार छोप्ने, प्रदर्शन तथा आन्दोलनमा आक्रामक भूमिका खेल्ने गरेका छन्।
