- ३ बैशाख २०८३, बिहीबार / Apr 16, 2026
एजेन्सी । युक्रेनमा जारी युद्धको सन्दर्भमा अमेरिकी राष्ट्रपति डोनाल्ड ट्रम्पले अब युद्धविरामको जिम्मेवारी युक्रेनी राष्ट्रपति भ्लोदिमिर जेलिन्स्कीको हातमा रहेको बताएका छन् । शुक्रबार अलास्कामा रुसी राष्ट्रपति भ्लादिमिर पुटिनसँगको भेटपछिको अन्तर्वार्तामा ट्रम्पले यस्तो बताएका हुन् ।
फक्स न्युजसँगको कुराकानीमा ट्रम्पले आफू, पुटिन र जेलिन्स्कीबीच त्रिपक्षीय बैठक हुने तयारी भइरहेको खुलासा गरेका छन् । यद्यपि सम्झौताका बुँदा भने उनले विस्तृत रूपमा खुलाएका छैनन् । “अब यो पूरा गर्ने जिम्मा राष्ट्रपति जेलिन्स्कीको हो । हामी त्रिपक्षीय बैठकको तयारीमा छौं,” ट्रम्पले बताएका छन् ।
“हामी धेरै कुरामा सहमत भयौं” — ट्रम्प
ट्रम्पका अनुसार, पुटिनसँगको वार्तामा भूमि अदलाबदली र युक्रेनका लागि अमेरिकाबाट सुरक्षा आश्वासन जस्ता विषयमा “धेरैजसो सहमति” भएको छ । उनले बैठकलाई “१० मध्ये १० अंक” दिँदै भने, “यो अर्थमा कि हामी निकै राम्रोसँग मिल्यौं ।” “हामी युद्ध अन्त्यको धेरै नजिक छौं । तर अन्ततः युक्रेनले सहमत हुनुपर्छ,” ट्रम्पले भने ।
ट्रम्पले पुटिनलाई “बलियो र कडा नेता” को संज्ञा दिँदै वार्ता “न्यानो माहौल” मा सम्पन्न भएको बताएका छन् । यद्यपि उनले जेलिन्स्कीको सहमतिबेगर कुनै अन्तिम सम्झौता सम्भव नहुने स्पष्ट पारे ।
युद्ध प्रारम्भपछि रुसमाथि कडा प्रतिबन्धको पक्षमा उभिएका ट्रम्पले अहिले भने त्यसबारे लचकता देखाएका छन् । “आजको बैठकले अहिले त्यसबारे सोच्न जरुरी छैन । सायद दुई–तीन हप्तामा फेरि सोच्नुपर्ने हुन सक्छ, तर अहिले होइन,” ट्रम्पले स्पष्ट पारे ।
