- १७ जेष्ठ २०८३, आईतवार / May 31, 2026
काठमाडौँ, २८ बैशाख । टर्किस एयरलाइन्सको एक जहाज त्रिभुवन अन्तर्राष्ट्रिय विमानस्थलमा अवतरण गर्ने क्रममा चक्कामा आगो लागेको छ ।
इस्तानबुलबाट सोमबार बिहान काठमाडौँ आएको टीके–७२६ कल साइनको विमान अवतरण गर्ने क्रममा उक्त घटना भएको हो ।
विमानस्थल सुरक्षा कार्यालयका एसपी राजकुमार सिलवालका अनुसार घटनापछि दमकल टोली तत्काल पुगेर आगोलाई नियन्त्रणमा लिएको थियो । घटनामा सबै यात्रु सुरक्षित रहेको उनले जानकारी दिए ।
हाल सुरक्षाका कारण रनवे अस्थायी रूपमा बन्द गरी विमानलाई ट्याक्सी–वे तर्फ लैजाने प्रयास भइरहेको छ । विमानलाई ट्याक्सी–वेमा लगिएपछि प्राविधिक जाँच गरिने पनि एसपी सिलवालले बताए ।
प्रारम्भिक जानकारीअनुसार विमानमा २७८ जना यात्रु र ११ जना चालक दलका सदस्य सवार थिए । उक्त विमानमा संयुक्त राष्ट्र संघका कूटनीतिज्ञहरू समेत रहेका थिए ।
यसअघि २०७१ सालमा पनि टर्किस एयरलाइन्सको विमान त्रिभुवन विमानस्थलमा दुर्घटनामा परेर धावनमार्ग अवरुद्ध भएको थियो । उक्त घटनामा मानवीय क्षति नभए पनि विमानस्थल चार दिनसम्म बन्द हुन पुगेको थियो ।
